ORANJESTAD – Loke hopi a boga p’e pa añanan largo a bira un realidad: e programa “Hunto pa Progreso” a fungi como un amnestia pa e poblacion inmigrante cu tabata biba “scondi”. Maske terminologia oficial a uza palabranan manera “regulacion”, e pordon di e falta di a biba irregularmente ta pone e programa aki den e categoria di un amnestia migratorio. Sinembargo, e incorporacion di miles di persona den e sistema legal ta bin acompaña pa consecuencia serio pa e servicio publico di nos isla.
Un pordon cu impacto directo
E definicion di un amnestia ta ora un gobierno ta dicidi di no persigui personanan cu a comete un infraccion legal. Den e caso di “Hunto pa Progreso”, esaki tabata exactamente e caso: e kedamento ilegal a wordo pordona pa permiti un bida legal nobo. Pero e legalisacion aki tin un “efecto domino” riba e capacidad di Aruba pa atende tur su habitantenan.
Consecuencia y desafionan pa Aruba
E aumento di e cantidad di personanan cu awor tin derecho legal riba tur servicio, ta crea un presion adicional riba un sistema cu ya caba tabata den un situacion delicado:
- Presion riba Cuido Medico: Cu e legalisacion, miles di persona nobo ta drenta den e sistema di AZV. Esaki ta nifica cu e tempo di espera pa bishita un dokter lo aumenta significativamente.
- Specialistanan y afspraak: Si ya caba tabatin un problema cu e lista di espera pa specialista, e amnestia aki lo por prolonga e esperanan aki pa lunanan extra, afectando tanto e cuidadonan local como e aplicantenan nobo.
- Infrastructura di scol: Famianan cu tabata biba den scondite awor tin e derecho y e obligacion di pone nan yiunan na scol. Esaki ta nifica cu klasnan lo bira mas yen, aumentando e necesidad pa mas docente y espacio den klasnan cu ya caba ta limita.
- Mercado di vivienda: E demanda pa cas di huur y casnan social (FCCA) lo subi drasticamente. Esaki por causa un aumento den e prijs di huur mas aun, afectando e poder di compra di e ciudadano comun.
- Servicio publico y trafico: Mas hende legalisa ta nifica mas auto riba caminda, mas demanda pa awa y coriente (WEB y ELMAR), y rijnan mas largo na instancianan manera Censo y Ontvanger.
E impacto economico: Un balansa necesario
No tur cos ta negativo. E amnestia aki ta un movecion strategico pa e economia, ya cu e legalisacion ta genera:
Contribucion na AZV y pensioen: E trahadonan legalisa awor ta paga nan primanan, locual ta duna un oxygeno financiero na e fondonan social. Pero ken ta asegura cu nan ta paga? Pasobra nan a haya un permiso SIN doño di trabao.
Conclusion: E oportunidad a pasa y e reto a cuminsa
Cu e registracion legalmente clausura y e periodo di “pordon” termina na januari 2026, Aruba ta drenta awor den e fase di realidad. E Minister di Husticia, Arthur Dowers, a bisa hopi cla: e amnestia a termina y e controlnan na luganan di trabao lo cuminza.
E reto pa Gobierno awor ta con pa maneha e aumento di demanda riba e sistema medico y educativo. E amnestia a trece legalidad, pero e ta exigi un inversion urgente den nos infrastructura pa evita cu e calidad di bida di tur habitante di Aruba ta bay atras
