ORANJESTAD – Un aña despues cu e coalicion actual a drenta den funcion, e biento den seno di partido AVP ta supla fuerte. Loke a cuminsa como un murmuracion den gangnan di partido, awor a bira un opinion publico habri riba rednan social: e percepcion cu Gerlien Croes ta esun cu tin e stuur di partido AVP den su man.
No ta un secreto cu den politica, percepcion hopi biaha ta bira realidad. Pa hopi siguidor y votador di e partido berde, e prome 12 lunanan di gobernacion a laga un sabor amargo pa e hala tradicional di e partido, mientras cu e figura di Gerlien Croes a haya mas influencia y poder di decision.
E “No” contra Desiree y e salida di De Meza
E prome señalnan di e dominio aki a bin dilanti durante e formacion di e gabinete. Fuentenan cerca di e partido ta recorda con e oposicion di Gerlien tabata determinante pa frena e nombramentl di Desiree Croes como minister. Esaki tabata e prome indicacion cu e lider di AVP tabata perdiendo tereno.
Mas profundo ainda ta e sentimento rond di loke a sosode cu Mike de Meza. Den opinion di hopi votador di AVP, e salida of e posicion den cual De Meza a wordo poni, no tabata algo casual, sino algo “orchestra” pa e mesun circulo rond di Croes, considerando con lihe e noticia a plama, unda reporteronan liga a haya e informacion mas prome cu Mike de Meza. Logicamente cu e sospecho tey cu Gerlien a lek e informe pa asina publicamente blaas de Meza, pa reken af di nan problema anterior.
HOFA: autonomia versus poder
Talbes e punto mas sensitivo pa e votador fiel di AVP ta e aceptacion di e ley di HOFA (Hunta di Supervision Financiero Aruba). AVP historicamente tabata e partido cu a boga pa autonomia.
Sinembargo, e opinion generalisa awor ta cu HOFA tabata un condicion “non-negociable” den e proceso di formacion di AVP/FUTURO, imponi of acepta pa e mando nobo pa por a sigura e puestonan den gobierno. Esaki a laga hopi hende ta puntra nan mes: unda e principio di autonomia a keda? y si e prijs pa keda na poder ta demasiado halto?
Finalmente
Mientras cu e partidonan den coalicion ta celebra un aña di trabou, e base di AVP ta parse dividi. Riba rednan social, e criticanan no ta baha den intensidad. Pa e votador, e pregunta no ta mas ken ta e lider riba papel, sino ken realmente ta dicidi e rumbo di e partido. Pa hopi, e contesta ta keda mescos: “Ta Gerlien ta manda.”
Con esaki lo afecta e partido den futuro cercano, ta algo cu solamente tempo lo bisa, pero e percepcion awor ta cu Mike Eman a perde vos y poder y ta bay na amen di Gerlien.
