Nos cas ta un lugar di respet, un lugar di harmonia, un lugar di trankilidad y sosiego, caminda tur hende na cas ta contento cu otro y bibando den un amor y pas di Dios.
Nos cas ta un lugar di displina y coreccion den amor di Dios, pa asina nos yuinan lanta cu integridad, cu bon karakter y conducta y respet pa nan mes y pa otronan.
Ta nos deber como mayor di coregi cada momento, for di chiki pasobra e mayor cu ta stima su yiu ta coregi y disiplina su yiu.
E asunto aki ta bay mas leu cu hende ta kere pasobra esaki ta un mandato di Dios, pa nos lanta e mucha den disiplina y amor di Dios.
Mayor ta keda responsabel pa su yiu, pasobra e mayor ta e prome ehempel cu un mucha mester ricibi, locual e mayor por duna creche no por duna, e mucha mester ricibi amor di su mayor.
Tin un bentana grandi di inmoralidad y malicia habri y e no ta respeta muchanan, especialmente nos mester lanta mucha cu boca limpi, boca puro liber di palabra malo y mentira.
Ora un mucha ta papia palabra malo, prome lugar cu tur hende ta wak ta for di cual cas e ta bini, pasobra educacion ta cuminsa na cas.
Ora un mucha no ta bisti decente, tur hende ta puntra ta ken ta su mayornan, pasobra ta nan deber di guia e mucha riba caminda di desencia.
Ora un mucha no conoce e palabra di Dios, y no tin temor di Dios, ta falta di su mayornan, pasobra nan bida mester ta un testimonio pa nan yiu por wak riba dje.
Nos mester tuma e autoridad pa hiba nos yuinan cas di Dios for di chiki, pasobra diabel a bini solamente pa horta, pa mata y pa destrui y no ta importa e edad cu e mucha por tin.
Si nos mes como mayor ta pleita y bringa dilanti di nos yuinan, con nos mes por kere cu nos yuinan lo lanta decente, stimando otro, si ta violencia cu ofensa so nan ta mira.
Si un mucha no wordo bon educa na cas, caya lo zorg di danje, pasobra riba caya no tin nada mas cu maldad y enganjo, laga nos djis tira un bista kico alcohol y droga ta haci cu nos hubentud.
Mescos cu un tata tin compasion cu su yuinan, asina Senjor tin compasion di esnan cu ta teme.( Salmo 103:13).
Mi yiu tende e instruccion di bo tata, y no lubida e ensenansa di bo mama, pasobra nan lo ta un bunita adorno pa bo cabes,y coyar na bo garganta. ( Proverbionan 1:8-9).
Te hasta un mucha ta conoci pa su hechonan, si su conducta ta puro y recto.( Proverbionan 20:11).
Coregi bo yiu y e lo duna bo trankilidad, si y e lo haci bo alma contento.( Proverbionan 29:17).
Den e tempo trabahoso cu nos ta bibando aden, ta dificil pa lanta un mucha sin Cristo Hesus, pasobra na cada skina , maldad ta broma, malicia ta aparece, inmoralidad ta para maner aun pilar.
No kere den locual hende ta bisa cu awendia muchanan sa tur cos, si nan sa tur cos di e maldad di mundo, pero nan no sa con defende nan mes y para firme contra trampa di diabel.
Mayor no haci bo yiu, grandi prome cu tempo, no corre saka streki for di su cabey, pero laga e crece trankil, den coreccion y hopi disiplina.
Dios ta disiplina esnan cu e ta stima.
Sinceramente, Pastor Marcel Balootje
