La Quinta Beach Resort ta anuncia e lansamento di su hardin di agroforesteria sintropico, marcando un capitulo nobo den su compromiso continuo cu turismo sostenibel y responsabel.
Den colaboracion cu Rhakeem Samuel di Dr. Greenthumb Aruba – Garden Consultancy & Maintenance, La Quinta a tuma su prome pasonan pa integra practicanan regenerativo directamente den su operacion. Cu participacion activo di su empleado, partner y miembronan, e iniciativa ta introduci un concepto di Farm-to-Members and Staff, unda productonan fresco, cultiva localmente, lo wordo produci riba mesun propiedad.
E iniciativa aki ta refleha e filosofia di La Quinta, cual ta cu sostenibilidad ta cuminsa for di paden, door di e cuido extendi na su empleadonan, su huespednan y e isla cu nan ta yama cas.
Un programa cu base di regeneracion di tera, un proceso cu ta bai mas aya di agricultura tradicional. A traves di agroforesteria sintropico, e tera no ta solamente wordo uza, sino activamente wordo restaura pa un tera mas resiliente den e area. Door di combina diferente especie di planta, aumenta materia organico y traha den harmonia cu ciclo naturalnan, e sistema ta reconstrui e salud di e tera, mehora retencion di awa y aumenta biodiversidad. Cu tempo, esaki ta crea un ecosistema autosostenibel unda e tera ta bira mas fertil y resistente den cada ciclo, en bes di degrada.
E enfoke aki ta alinia cu movimiento global pa agricultura regenerativo y ta posiciona La Quinta como un contribuyente cu vision avansa pa practicanan di turismo mas sostenibel y responsabel na Aruba.
Un momento special durante e lansamento tabata cu La Quinta su Presidente, Sr. Stephen Scaturro, kende a ricibi e honor di planta e prome mata, simbolisando su fe continuo den practicanan di sostenibilidad.
Mientras e hardin ta sigui crece, La Quinta Beach Resort lo sigui integra su cosecha den e experiencia di huespednan y empleadonan, reforsando un modelo unda hospitalidad y responsabilidad ambiental ta bai man den man.
