Den un esfuerso pa proteha e autonomia di Aruba y trece claridad riba e desaroyonan politico actual, e fraccion di PPA a yega Hulanda pa un siman determinante di reunionnan den curason di politica Hulandes.
Despues di un biahe largo pa Den Haag, e delegacion a cuminsa mesora cu nan agenda intensivo. E meta principal di e bishita aki ta pa duna bos na e posicion di e partido y di un gran parti di e comunidad Arubano tocante e futuro di e isla den Reino, specificamente relaciona cu e propuesta di e Ley di Reino riba Supervision Financiero (Rijkswet HOFA).
Cita cu lidernan politico den Tweede y Eerste Kamer
E fraccion tin planea varios encuentro strategico cu representantenan di e partidonan grandi cu tin asiento den tanto Tweede como Eerste Kamer. Durante e reunionnan aki, PPA lo splica e dinamica actual na Aruba y e preocupacionnan cu tin rond di e implementacion di e Rijkswet HOFA.
Segun lider di fraccion PPA Eduard Pieters, nan meta ta pa e politiconan na Den Haag compronde cu e autonomia di Aruba no ta negociabel. “Fraccion di PPA no lo entrega ni un centimeter di nos Status Aparte cu nos antepasadonan a lucha tabto p’e. Nos no por laga nos pueblo ni nos futuro generacion na caya” e lider di fraccion a enfatisa formalmente.
Proteccion di e anhelo di nos pueblo
E bishita aki tin un nificacion historico fuerte. E partido a recorda cu Aruba a lucha hopi aña, inclusivo prome cu aña 1986, pa bira “baas den nos mesun cas”. PPA ta mira cu e intencionnan actual di cierto gruponan di ambtenaar por mina e posicion aki, loke por nifica un decadencia den e autonomia cu Aruba a logra cu su Status Apartena 1986.
Alerta contra e ‘minamento’ di autonomia
Un di e puntonan di preocupacion cu lo wordo presenta na e parlamentarionan Hulandes ta e observacion di PPA cu tin movecionnan pa hiba Aruba bek na e tempo di prome cu 1986. E fraccion a declara cu nan ta determina pa para firme contra cualkier intento cu por debilita e structura politico cu ta defini e pais como un entidad autonomo den Reino.
E fraccion a priminti di tene e pueblo di Aruba informa durante henter e siman aki conforme e reunionnan y resultadonan cu e bishita aki na Den Haag lo trece cune.
