Dialuna mainta, Minister di Husticia, Integracion, Transporte Publico y Energia, mr. drs. Arthur Dowers, hunto cu director di AWSS N.V. Joseph Everon y CFO di AWSS Randolph Ruiz, a duna miembronan di Parlamento un presentacion amplio tocante e trabaonan andando desde cu e mandatario di Husticia a tuma encargo di e maneho di AWSS.
Na momento cu Minister Dowers a haya e responsabilidad di AWSS, a inicia inmediatamente cu varios estudio pa haya un bista real di e situacion cu a topa. Esaki a inclui evaluacion di e obhetivonan operacional di AWSS, IT, Recurso Humano y cumplimento cu e Corporate Governance Code.
E investigacion a revela puntonan di preocupacion serio: falta di maneho, ausencia di un cuadro strategico, dependencia di un solo recurso financiero y maneho presupuestario inapropia. Ademas, no tabata existi control interno, ni sistema di whistleblower ni cumplimento etico, locual a aumenta significativamente e riesgonan pa AWSS y su posicion di resiliencia.
Pa logra un funcionamento solido di AWSS, ta esencial pa tin segregacion di maneho, transparencia financiero y claridad den rol di cada ken den e organisacion. AWSS ta genera miyones pa aña a traves di pasaheronan cu ta paga pa nan ED Card, pero tabata maneha e fondonan aki di manera iresponsabel. Esaki a forma e base pa implementacion di cambio drastico den e maneho for di momento cu Minister Dowers a tuma responsabilidad.
Na 2024, e situacion operacional tabata critico. E planta na Bubali tabata funciona na solamente 35% di su capacidad, Parkietenbos na 0%, Zeewijk na 65% y e incinerator na 25%. Awe, e resultadonan ta mustra progreso concreto: Bubali Plas ta opera na 65%, Parkietenbos na 90%, Zeewijk a keda stabiel na 65% y e incinerator ta sigui opera na 25%, mientras cu ta atende cu un acumulacion di desperdicio medico di mas cu un aña.
Considerando cu e standard mundial pa maneho di desperdicio medico ta 48 ora, AWSS ta enfrenta un reto grandi pa procesa e fluho diario y alabes elimina e atraso existente. Den e marco aki, Everon a confirma cu pronto lo pone dos incinerator mas den funcion pa aumenta capacidad y eficiencia.
E incinerator tin un rol strategico amplio: no solamente procesa desperdicio medico, sino tambe sludge cu ta resta despues di procesa awa sushi, carcas di bestia morto, droga y productonan ilicito confisca pa Aduana, KPA, documentonan sensitivo di instancia manera Ministerio Publico, Corte y Pais Aruba.
Na mes momento, a inverti significativamente den capacitacion di personal, mehoracion y renovacion di e edificio na Parkietenbos, upgrade di e incinerator pa uza gas LPG na luga di diesel, y optimalisacion di e facilidadnan pa ricibi desperdicio.
Minister Arthur Dowers a expresa su satisfaccion cu e progreso logra, enfatisando cu e cambio tabata necesario y urgente. E ta mira cu confiansa den e direccion actual, cu ta dunando resultado concreto y ta contribui na reestablecemento di un servicio publico esencial cu tin impacto directo riba salud, medio ambiente y calidad di bida na Aruba.
