Ora nos ta amigo, nos ta amigo tur momento, y si algo mester pasa cu mi amigo, esey no ta nifica cu amistad a kibra, pa motibo di hende, pasobra hopi biaha nos ta haci cos pa hende mira, y nos ta lubida kico e palabra di Dios ta bisa.
Hesus a bisa: Boso ta mi amigo si boso haci locual Mi ta bisa boso y si boso ta stima boso ruman.
Den Juan Capitulo 15:12-17 Hesus ta splica bon cla ki ora nos amistad ta bon cu Hesus y ki ora nos amistad ta bon cu nos prohimo.
Mi prohimo a cay den pica, no ta motibo pa mi kibra amistad, pero tin un motibo pa mi mantene mi amistad y asina mi por aserca y yuda mi prohimo, lanta bek.
Den e stad caminda Zakeo tabata biba e no tabata gusta pa motibo di su trabao, pero Cristo Hesus si a bay su cas y bisa cu awe salbacion a yega na e cas, y cu Zakeo tambe ta yiu di Abraham.( Lucas 19:9).
Si nos expresa nos rabia contra un persona cu a cay den cualkier eror, nunca nos por trece un persona asina na Cristo, pasobra nos ta blokia nos curason, y door di e blokeo ey e amor di Dios , no por pasa, pasobra amor no por pasa door di un curason sera.
Ta necesario pa nos tin tres tipo di amigo den nos bida:
E amigo Mentor, cual ta e amigo consehero,Madura,cu ta duna guia tur momento.
E amigo cu ta encurasha, cu tin palabra di aliento, cu tin curason pa reconcilia y restaura, cu no ta keda wak fout , pero ta bini cu un solucion, y ta pusha bo pa no entrega , pero sigi bay dilanti.
E amigo cu ta bisa bo bo berdad, y por guia bo na arepentimento, amigo cu ta bisa bo cu pica ta pica y pica mester wordo confesa, pa asina bo ta bon cu Dios y asina bo ta bon cu e amigo tambe.
Tipo di amigonan asina ta bishita hende tur momento, y ta cla para pa yuda den momento dificil.
Tin cuater pilar cu tur amistad mester conoce, sino no tin amistad.
Nan ta; Confiansa, Respet, Compromiso y Comunicacion.
Confiansa ta locual mester existi pa amistad existi.
Respet ta locual ta duna tur amistad nan nivel.
Compromiso ta cualifica e tipo di amistad.
Comunicacion ta pone nos balora otro.
Laga nos tuma bon na cuenta amistad di Hesus y Lazaro y Pablo cu Timoteo.
Awendia nos tin cu sinja nos hubentud kico ta berdadero amistad: Por ehempel nan mester sa esaki.
Proverbionan 13:20: Esun cu cana cu hende sabi lo ta sabi, ma un companjero di hende bobo lo sufri danjo.
Si como hoben bo ta cana cu hende cu ta cana cu arma y ta bende droga, ta horta, ta bringa, ta bebe sin control,ta cana tene relacion sexual cu tur hende, anto bo tin cu samina bo amistad y samina bo consenshi, pasobra tipo di amistad asina no ta bon.
Pero semper ta bon pa purba yuda cu e palabra di Dios, pasobra den e palabra di Dios tin e berdad cu ta haci hende liber.
No tin mihor amigo cu Cristo Hesus kende a duna su bida pa nos, E ta nos amigo fiel, cu tur momento ta huntu cu nos y nos por aserke pa tur cos, cu nos mester.
Pesey nos tambe mester stima nos amigo, pasobra asina nos ta demostra cu nos ta fiel y berdadero amigo di Cristo Hesus.
Sinceramente, Pastor Marcel Balootje
