Despues di un reunion cu secretario di estado Eric van der Burg y conseho di minister dialuna atardi Prome Minister mr. Mike Eman a comparti mas di su vision pa nos isla.
E ultimo siman Aruba tabata cede di e 21 edicion di e OCT-EU Forum, un momento clave di cooperacion internacional hunto cu e paisnan y teritorionan ultramar. Eman a enfatisa e importancia di e encuentro cu Union Europeo aki, unda Hulanda tambe a tuma un rol activo den presentacion di varios proyecto y vision di Aruba pa tin acceso n’e fondonan Europeo.
Den e cuadro aki, Secretario di estado Eric van der Burg tambe a hiba palabra durante e OCT-EU Forum. Aki van der Burg a duna sosten y aporte positivo rib’e rumbo cu Aruba ta propone, specialmente relaciona cu e desaroyo di e tereno di ex-refineria. E proyecto aki ta considera un iniciativa grandi y compleho, cu lo pasa den diferente fase, entre otro limpiesa, preparacion di tereno, destaho internacional y posibel inversion pa desaroyo den futuro.
Durante e bishita di Jozef Síkela, Comisario di Union Europeo na Aruba tabatin oportunidad tambe pa presenta e situacion directo di e area di e ex-refineria. A ilustra e reto di balansa desaroyo economico, proteccion di naturalesa y e separacion entre areanan industrial y residencial cu tin estableci pa varios decada caba den e area pariba di brug.
Gabinete AVP-Futuro a presenta su vision completo durante reunion di secretario di estado cada mandatario a splica e prioridadnan di cada ministerio, reforma social y economico, entre nan pension, beneficionan social y pakete di remedi, cu enfoke riba sostenibilidad financiero.
E vision general ta enfoca riba un Aruba cu ta progresa cu responsabilidad, cu ta fortifica su economia mientras ta proteha identidad, cultura y medio ambiente. Den esaki, Hulanda y e partnernan Europeo tin un rol importante den cooperacion continuo, specialmente rib’e area di naturalesa y desaroyo duradero.
E tema di preclearance cu Union Europeo tambe a bin dilanti como un punto importante den e discusionnan, y e expectativa ta cu pronto lo tin varios reunion pa asina Aruba por concretisa esaki. Prome Minister Mike Eman ta enfatisa cu e sosten y avance den e proceso di renobacion di pais den un colaboracion estrecho cu Union Europeo y Hulanda ta avansa.
