Den un ambiente calido y culturalmente enrikecedor, Prome Minister Mike Eman a ricibi recientemente bishita special unda a haci entrega di dos publicacion literario cu enfoke riba identidad, desaroyo personal y imaginacion creativo.
Entre e obranan presenta tin Quingo Flamingo y Isla di Lionel, buki di mucha crea pa autornan Boneriano Delno Tromp y Elsmarie Beukenboom. E historia ta relata e aventura di un flamingo curioso cu ta bula for di Boneiro pa descubri otro isla den Caribe. Den su trayecto, e ta bishita Corsou y finalmente Aruba, unda e ta baha den Parke Nacional Arikok.
Na Aruba, Quingo ta topa diferente personahe emblematico di nos naturalesa, incluyendo Shon Choco, Shon Patrishi y Shon Cascabel. Durante su exploracion, e ta pasa pa experiencia di curiosidad, sorpresa y tambe un momento di susto ora e topa Cascabel, reflehando di un forma relativo e diversidad y caracter unico di fauna local. E historia ta integra elemento di fantasia cu educacion ambiental, resaltando tres espesie cu no ta presente na Boneiro, y promoviendo conciencia entre muchanan riba balor di biodiversidad di Aruba.
Adicionalmente, a presenta buki Isla di Lionel cu ta enfoca riba e trayecto di un hoben cu a bay studio den exterior y, despues di su formacion, a regresa Aruba pa realisa su aspiracionnan. E narativa ta destaca perseverancia, identidad y e decision consciente di bolbe contribui na desaroyo di su pais, un tema cu ta resona ampliamente den comunidad.
E encuentro entre e autornan, caracterisa como uno ameno y inspirativo, unda a comparti nan pasion pa literatura y storytelling como instrumento pa educacion y formacion personal.
Gobierno di Aruba ta reconoce e importancia di intercambio cultural manera esaki, cu ta contribui na fortalecemento di identidad nacional/regional, cu e enfoke pa sigui stimula proyecto cu ta conecta educacion, cultura y desaroyo personal como base pa un sociedad mas consiente y resiliente.
