Den su mision politico na Den Haag, parlamentario Eduard Pieters di fraccion di PPA no solamente a ripiti su posicion contra Rijkswet HOFA, pero el a revela un problema mas profundo: un falta serio di comprension na Hulanda riba loke realmente ta pasando na Aruba.
Durante e reunionnan cu miembro di Partij voor de Vrijheid y e otro fraccionnan, Pieters a pone e enfoke riba un dimension, cu ainda no a destaca suficientemente: e desconexion entre decisionnan na Den Haag y realidad na Aruba.
“Si nos no papia, otro lo defini nos futuro”
Un di e mensahe mas fuerte cu Pieters a hiba ta, cu hopi politico Hulandes, specialmente esunnan nobo, cu nunca of masha poco a bishita Aruba of otro isla den Reino Hulandes, ni tampoco tin experiencia directo cu nos realidad.
“Hopi di nan no conoce nos contexto,” Pieters a bisa. “Si nos no trece e informacionnan aki, nan no ta haya e cuadro completo.” Esaki ta splica pakico PPA ta sinta cu tur partido, sin exclui niun, pasobra e mision no ta politico partidista, pero nacional.
HOFA como resultado di un trayecto di mas di 10 aña
Pieters a pone tambe enfasis riba historia tras di HOFA: un trayecto di mas di 10 aña, presion constante for di aparato administrativo Hulandes, unda nan ta buscando e instrumentonan necesario pa aumenta control riba e paisnan autonomo den Reino Hulandes.
Segun Pieters, esaki no ta un evento aisla, pero un desaroyo gradual: “Paso pa paso, nan a purba limita nos autonomia.”
Aruba no ta problema—Aruba ta resultado positivo
Un punto cu Pieters a logra posiciona bon cla na Den Haag ta cu Aruba no ta un caso di fracaso, pero ta un ehempel di disciplina financiero. Y esaki ta basa riba e echonan manera: upgrade reciente di rating internacional, reduccion di debe y crecemento economico despues di crisis.
“Esaki no a bin di nada. Esaki ta resultado di trabou duro di pueblo Arubiano,” el a enfatisa.
Esaki ta cambia e narativa na Hulanda tambe, ya cu no tin base real pa trata Aruba como riesgo financiero.
Un pregunta cu Den Haag no por evita
Durante e reunion, Pieters a cuestiona e Hulandesnan y asina haya nan reaccion riba e ponencianan fundamental aki: Si Aruba ta cumpli; Si Aruba ta mehora; Si Aruba ta responsabel…
pakico e mester acepta un sistema externo cu ta limita su decisionnan?
E pregunta aki a haya oido cerca e parlamentarionan Hulandes.
Realidad politico: presion no ta di politico, pero di sistema
Un punto importante cu Pieters a comparti y pone enfasis riba dje cu e Hulandesnan ta relaciona cu e decisionnan, cu no semper ta sali di politiconan, pero di “ambtenaren” cu ta crea y pusha e cuadro legal. Esaki mas cu claro ta cambia e narativa di e conflicto, paso no ta solamente un debate politico, sin un lucha structural di poder.
Aruba ta na un punto decisivo
Segun Pieters, e situacion actual ta uno di definicion. Of Aruba ta acepta e direccion aki of Aruba ta para firme pa su posicion constitucional. Pero pa logra esey, el a enfatisa algun cos clave: Aruba mester sigui ta presente na nivel internacional, Aruba mester sigui educa otro y Aruba mester sigui defende su historia.
Finalmente e bishita na Den Haag ta confirma algo importante. E lucha pa proteha Status Aparte awor ta hiba den dos frente: local y internacional. “Nos no por keda keto,” Pieters a conclui.
“Paso silencio ta e forma mas liher pa perde loke nos antepasadonan a lucha y logra.”
Y den e realidad politico aki, un cos ta cla: Autonomia bo no ta perde den un biaha. Ta perde ora bo laga otro defini bo historia y futuro.
