Oranjestad – E caso di corupcion cu a sacudi Aruba a yega na un punto decisivo, ora cu e ex-minister Benny Sevinger a ricibi su sentencia definitivo.
Awor ta yega ora pa investiga e daño causa na pais Aruba y recupera tur tereno y placa envolvi.
Segun un mocion presenta pa Parlamentario Endy Croes (Staten) den reunion publico di 15 di april 2026 , e caso “Avestruz” no solamente ta representa e escandalo di mas grandi di corupcion den historia di Aruba, pero tambe a resulta den condena di 11 aña di prizon.
E mocion ta pone enfasis riba un punto critico: Aruba mester sa exactamente e daño financiero cu a wordo causa.
Gobierno ta wordo pidi pa:
1. Determina e daño economico real causa door decisionnan y accionnan di e ex-minister y otro involucra.
2. Reporta dentro di seis luna cu resumen riba riesgo y perdida.
3. Implementa medidanan pa recupera placa, incluyendo reclamo legal y recuperacion di tereno.
UN MOMENTO DI BERDADERO TEST POLITICO
Pero e discusion no ta solamente legal pero tambe politico.
“Ken ta gobernando pa Aruba?” ta e pregunta grandi cu ta keda den aire. E mocion lo mustra si interes di pais ta bini promer, of si partidonan lo sigui proteha nan mes.
Tur wowo awor ta riba e trio di Futuro. Nan decision lo manda un señal cla:
Lo nan vota na fabor di transparencia y contra corupcion?
Of lo nan keda banda di interes politico y defende nan cosnan robes ?
E votacion di awe no solamente ta trata di un caso di pasado, pero di direccion moral di Aruba pa futuro.
PUEBLO TIN WOWO HABRI
Ciudadanonan ta wak cu atencion. Despues di añanan di desconfianza, e momento aki por bira un punto di cambio of un confirmacion cu nada a cambia.
Un cos ta cla: e pueblo ta kere den husticia. Awor ta tempo pa lidernan mustra si nan tambe ta kere den dje.
Politica Nobo ta na prueba! Lo mira ki direccion Partido Futuro ta tuma.
