Miembro di Parlamento pa AVP, Sra. Stephany Sevinger, a indica cu e situacion di trafico y parkeo den e area di high-rise na Palm Beach a yega na un punto critico, unda e problema no ta solamente incomodo, sino tambe peligroso y un mal bista pa un di e areanan mas importante pa nos economia y industria turistico.
E zona di Palm Beach ta representa un di e motornan principal di turismo na Aruba, unda miles di bishitante ta move tur dia. Segun parlamentario Sevinger, e congestion y desorden actual no ta refleha e calidad, profesionalismo y hospitalidad cu Aruba kier mustra na mundo.
No solamente bishitantenan ta afecta, pero tambe miles di empleado cu ta traha na hotel, restaurant, casino, tienda y otro servicio den e strip di high-rise. Hopi di nan ta enfrenta dificultad diario pa yega trabou na tempo y pa regresa cas, loke ta crea stress, atraso y afecta e bienestar di hopi hende cu ta mantene nos economia andando.
Parlamentario Sevinger a enfatisa cu, aunke Palm Beach ta un punto focal importante, e problema di parking y trafico a bira un reto nacional. Cu e crecemento di turismo y e aumento continuo di vehiculo riba nos isla, nos ta mira situacion similar den diferente area, manera na Eagle Beach unda ciudadano ta obliga pa nan mes controla parkeo riba santo, y cerca di faro unda congestion y desorden ta crea riesgo pa siguridad di usuario di caminda. Tambe den centro di Oranjestad, parking a keda pa añanan caba un di e obstaculonan mas grandi pa desaroyo economico y mobilidad urbano.
Segun Sevinger, e situacion actual ta representa un peliger real pa siguridad di conductor, peaton y tur usuario di caminda. Falta di parking suficiente, falta di trottoir adecua y congestion continuo por resulta den accidente y por complica acceso rapido pa servicionan di emergencia ora cada seconde ta conta.
Parlamentario Sevinger a reconoce cu e retonan den e areanan mas afecta no ta nobo y cu e autoridadnan relevante ya ta plenamente consciente di e problema. Tin diferente estudio haci y proyecto ya identifica pa aborda e situacion di forma structural.
“P’esey, e prioridad principal awor mester ta implementacion efectivo y rapidez den ehecucion,” Sevinger a declara. “Comunidad, empleado y empresarionan ta desea mira progreso concreto y resultado visibel den un tempo razonabel.”
Sevinger ta consciente cu proyecto di infrastructura den un area turistico cu hopi actividad ta naturalmente compleho y ta rekeri coordinacion entre diferente institucion y sector. Sin embargo, segun su persona, e urgencia di e situacion ta exigi claridad den planificacion, comunicacion constante cu e comunidad y responsabilidad pa evita retraso innecesario.
Soluciona e problema di trafico y parking na Aruba no ta solamente un cuestion di comodidad, sino un cuestion di siguridad publico, sostenibilidad economico y reputacion nacional.
Parlamentario Sevinger a expresa su apoyo total na e proyecto y iniciativanan cu ya ta den proceso pa mehora mobilidad, amplia capacidad di parkeo y optimalisa fluho di trafico den e areanan mas afecta. Su persona a indica cu lo sigui sostene esaki cu accion y mocion den reunionnan parlamentario venidero.
Na mes tempo, Sevinger a haci un yamada respetuoso na tur autoridad y partner relevante pa prioritisa y acelera e realizacion di e solucionnan cu ya ta identifica, pa asina logra resultado concreto cuanto mas pronto posibel.
“E meta final ta cla: crea un infrastructura moderno, sigur y funcional pa miles di empleado, residente y bishitante cu ta uza nos camindanan tur dia,” parlamentario Sevinger a conclui.
Sevinger a agrega cu infrastructura den un pais den crecemento no ta un luho, sino un necesidad fundamental. Inversion den e area aki — manera iluminacion publico, siguridad, asfalt y maneho di trafico — ta esencial pa sosten e desaroyo di Aruba y pa evita cu problemanan cu a keda neglisha pa hopi tempo sigui agrava.
