Diasabra awor, 25 di april, e mas chikitonan di nos futbol lo ta e protagonistanan principal ora cu Arubaanse Voetbal Bond (AVB) oficialisa e clausura di e Campeonato 2025-2026 pa e categorianan Mini-Mini (U-5) y Mini-Baby (U-7).
E evento aki, cu ta priminti di ta un mainta yen di emocion y alegria pa e famia futbolistico, lo tuma luga den Centro Deportivo Guillermo Prospero Trinidad (CDGT). Despues di un aña deportivo exitoso, AVB lo premia tur e muchanan cu a participa cu un medaya di campeon, resaltando e balornan di deporte desde un edad trempan.
Orario di e actividadnan
AVB a coordina e siguiente orarionan pa e categorianan:
- Mini-Mini (U-5): Tur ekipo mester ta presente pa 8:00 AM, ya cu e weganan lo inicia pa 8:30 AM en punto.
- Mini-Baby (U-7): E hungadonan mester ta presente pa 9:30 AM pa asina cuminsa cu nan partidonan pa 10:00 AM.
Reglanan di orden y siguridad
Pa garantisa cu e clausura cana den un forma organisa y ordena, e organisacion ta pidi cooperacion di tur presente cu e siguiente puntonan:
- Acceso: Tur hungado, entrenador, lider y fanaticada mester drenta via e entrada di e tribuna sin dak (banda di Entertainment Center).
- Presencia riba tereno: Ta estrictamente prohibi pa mayornan subi e tereno di wega. Lo tin personal di siguridad presente pa vigila cu esaki wordo cumpli.
- Fotografia: AVB lo tin su fotografo oficial pa capta e momentonan di e weganan y e entrega di medaya.
Informacion pa e fanaticada
E invitacion ta keda extendi na tur mayor y fanaticonan pa bin apoya e futuro streanan di futbol Arubiano. E tarifa di entrada lo ta Afl. 5,00 pa adulto y Afl. 3,00 pa mucha te cu 12 aña.
AVB ta felicita tur e clubnan miembro y e hungadonan pa nan dedicacion durante e campeonato aki y ta spera un clausura exitoso den Centro Deportivo Guillermo Prospero Trinidad.
