E disucion pa loke ta trata entiero ta sigui! Mientras 24ora.com kier twist e noticia, bisando cu Olive Tree a cambia maneho pa Famia Croes, ta falso atrobe.
SOLO a haya un copia di e protocol di funerarianan. Na prome lugar por constata cu Olive no a firme.
Tambe na punto 5c, e protocol ta menciona cu famia por wak y por despedi.
Esaki ta hiba nos e ora na e situacion unda Aurora Funeral Home a dicidi unilateral pa kita e derecho aki di famianan.
No tin nada di cambio di maneho pa famia Croes, pasobra esaki NO ta prome entiero di covid cu Olive Tree a hasi.
Pues e intento di 24Ora, Nelson Andrade y Patrick Paskel pa duna un tinte politico na e acto aki of pinte como un fabor politico, ta nada otro cu gañamento!
Esaki pa motibo cu Famia Croes nunca a haci un yamada na Crisiteam, ni na Dvg ni na ningun minister, pero a bay segun e oferta cu a ricibi di Olive, cual a cumpli cabalmente cu permiti famia wak y despedi.
Tampoco a pidi Olive pa ningun fabor!
Pues e alegacion haci tambe pa DVG, cu Olive a cambia maneho, ta otro invento mas y falso.
Ate protocol aki, lese y haya sa e berdad, cu ta skirbi den punto 5c cu por a wak y despedi.
Aki e protocol:
Palabracion pa funeral di un persona cu a fayece cu COVID19
Meta:
Pa tin claridad y uniformidad entre e empresanan di funeraria pa mantene na ley y reglanan di seguridad y higiena prome, durante y despues di funeral di un persona cu a fayece di COVID19.
Protocol:
1. Famia no mag di mishi cu e curpa ni promer ni despues di morto .
2. Ora di yama funeraria mester avisa cu e persona ta COVID19.
3. E medidanan standard di precaucion ta ser manteni pa locual ta trata e seguridad di personal di empresa funeraria.
4. E morto ta ser poni of den un body bag of un serbete cu ta bon ahusta na e cara pa preveni cualkier tipo di transmision.
5. E famia ta ser informa di e reglanan di seguridad cu mester mantene na dje durante e funeral / tin condolencia separa?
a. Difunto lo no ser hiba cas pa despedida.
b. Famia no mag di mishi cu e difunto bao di ningun circumstancia.
c. Prome cu condolencia general e famia por despedi pero mester tin un glas entre e difunto y e famia.
d. Por scoge entre condolencia cu caha sera of cu e glas riba dje.
e. Durante entiero no mag di duna man, brasa of sunchientre e presentenan.
f. Ta permiti un maximo di 10 persona cu por ta presente durante e entiero of na Santana den un solo momento – pues no ta permiti ‘crowding’ y mester cumpli cu ‘social distancing’.
Pa por cumpli cu regla di higiena pa cu e famia e empresa encarga cu e funeral lo hasi lo siguiente:
1. Informa debidamente di e reglanan aki.
2. Ofrece handsanitizers (70% alcohol) durante condolencia, entiero y na cremacion of entiero.
3. Tin presente productonan pa hasi e caha limpi constantemente durante condolencia y entiero.
4. Na Santana lo no permiti pa famia saca bebida for di ijs jug. …
5. Lo marca e lugarnan pa asina por mantene na ‘social distancing’.
Pa por cumpli cu ley di seguridad:
1. Semper lo tin un persona di funeraria presente.
2. Na momento cu famia no mantene su mes na e reglanan e persona di contacto lo ser informa y lo pidi pa tuma acciondi biaha.
3. Si comportacion di e presentenan no ta segun palabracion, e funeraria por yama Cuerpo Policial of Cuerpo Especial Arubano pa mantene e orden.
4. Den caso extremo e defunto ta ser dera sin famia aserca.
Empresanan funerario ta palabra cu esaki ta procedura cu nan lo ehecuta.
LathamSr.A.Rodriguez
CcDepartamento di Salud Publico
Cuerpo Policial
Cuerpo Especial Arubano
