E datonan mas recien di CBS pa luna di maart 2026 ta confirma loke nos tur ta sinti den supermarket: e prijs di alimentacion no ta pordona.

ORANJESTAD – E situacion economico na Aruba ta birando cada bes mas preta. Segun e ultimo informe di CBS, e Indice di Prijs di Consumo (CPI) a registra un subida di 0.7% den e luna di maart. Mas preocupante ainda ta cu e inflacion den e ultimo 12 lunanan a alcansa 1.1%, un aumento grandi compara cu e 0.1% cu tabata tin e aña anterior.

Casi MITAR di tur producto a subi di prijs!

Loke ta mas alarmante den e informe aki ta e cantidad di producto cu a bira mas caro. Un cifra cu ta resalta ta cu 49% (casi e mitar!) di tur e productonan cu ta wordo midi den e “canasta” di consumo, pues loke ta esencial pa biba, a registra un subida di prijs den luna di maart. Esaki ta nifica cu ora bo drenta un tienda, bo tin casi 50% di chens cu e producto cu bo kier cumpra ta costa mas cu luna pasa.

Cuminda ta e dolor di cabes principal

Pa e famianan na Aruba, e sector di alimentacion ta esun cu mas ta afecta e presupuesto mensual:

E indice di cuminda en general a subi cu 0.7% den solamente un luna.

Si nos mira e comparacion cu aña pasa, e sector di “Cuminda y bebida no-alcoholico” a mira un subida total di 3.1%.

    Esaki ta nifica cu e placa cu bo tabata uza pa yena bo garoshi di cuminda aña pasa, awe no ta alcansa mas pa e mesun productonan.

    Un lucha pa sobrevivi

    E impacto di e subidanan aki ta wordo refleha den e Nivel di Subsistencia. Pa un famia di dos adulto y dos mucha por cubri nan necesidadnan basico, awor nan mester di Afl. 5,602 pa luna. Esaki ta un aumento di 51 florin extra compara cu luna pasa.

    Pa un persona cu ta biba su so, e situacion ta hopi mas critico:

    E nivel di subsistencia pa un solo persona ta Afl. 2,668 pa luna.

    Considerando cu e salario minimo ta Afl. 2,007, un trahado cu ta gana minimo tin un falta di 661 florin tur lunadjis pa yega na e nivel basico di bida. Esaki ta e di dos deficit mas halto registra den e ultimo 6 añanan.

      No ta cuminda so…

      Fuera di alimentacion, otro cosnan cu a subi drasticamente den maart ta:

      Paña y salato: Un subida enorme di 12.5%.

      Gasolin y Diesel: + 25%

      Vakantie: E prijsnan pa bay cu vakantie a subi cu 9.9%.

        Cu casi mitar di tur producto subiendo di prijs, e pueblo Arubiano tin cu sigui busca manera pa “rek e florin” mas tanto posibel.

        RELATED ARTICLESMORE FROM AUTHOR