Diamars mainta, durante un conferencia di prensa dilanti di Bestuurskantoor, como Minister di Deporte, sra. mr. Gerlien Croes a anuncia, hunto cu partnernan IBiSA, CEDE ARUBA, Lotto pa Deporte y Fundacion Movemiento ta Bida, e lansamento oficial di un proyecto piloto di “Wega Ariba Wiel” (WAW) pa adulto mayor.
E proyecto piloto aki lo tuma luga durante e siguiente dos lunanan, cuminsando 4 di mei binidero,cu e meta pa motiva nos adultonan mayor pa keda activo y participa regularmente den actividadnan fisico den nan propio bario.
Un elemento clave di e iniciativa aki ta e introduccion di e di dos WAW mobiel, cu lo ta bayendo directamente den barionan pa movemento y recreacion mas cerca di comunidad. E WAW mobiel lo sigui un schedule cu pronto lo wordo publica, pa asina centro, club, grupo y individuonan por sa exactamento unda y ki ora e actividadnan lo tuma luga den bario. E WAW mobiel nobo lo amplia actividad pa mucha- y hoben tambe den barionan di FCCA.
“Wega Ariba Wiel” ya a demostra su impacto positivo den barionan cu un enfoke riba mucha- y hobennan, danki na CEDE ARUBA, IBiSA y tur otro partner. Cu e expansion aki pa adulto mayor, gobierno ta sigui amplia su alcance pa promove un estilo di bida saludabel pa tur generacion.
Despues di e fase piloto, lo haci un evaluacion di e resultado pa determina e siguiente paso, incluyendo e posibilidad pa amplia y continua cu e programa den otro districtonan tambe.
Minister Gerlien Croes a expresa su aprecio na tur partnernan cu a contribui na desaroyo y lansamento di e iniciativa aki. Nan compromiso ta esencial pa e exito di “Wega Ariba Wiel”.
Pa mas informacion, peticion of pa consulta e schedule di e WAW mobiel, tur esnan interesa por tuma contacto cu IBiSA.
Mas informacion di e Wega Ariba Waw mobiel of otro actividadnan ta disponibel riba e website di actividad.aw.
Cu e iniciativa aki, nos ta reafirma nos compromiso pa promove movecion, salud y bienestar entre nos adultonan mayor, hibando deporte y recreacion mas cerca di e comunidad.
