Despues di casi un aña di gobernacion, e gobierno actual ainda no a logra pone claridad basico den su propio structura di responsabilidad. Te ainda, e “Landsverordening Instelling Ministeries” LIM no a wordo aproba, loke kiermen cu oficialmente no ta cla cua minister ta responsabel pa cua cartera.
E situacion aki no ta solamente preocupante, pero tambe inaceptabel. Un gobierno cu no tin su propio reparticion di tarea formalisa, ta crea confusion tanto internamente como pa Parlamento y pa pueblo. Esaki a bira mas evidente ora un otro minister a aparece den Parlamento pa duna splicacion riba un tema cu formalmente ta cay bou di responsabilidad di e minister-presidente, cu ta firma e reportahenan di Landspakket.
E resultado ta un gobierno cu ta opera sin linea cla, sin responsabilidad defini y sin transparencia suficiente. Esaki ta debilita control parlamentario y ta mina confianza di ciudadano.
Nos pais merece miho. Gobernacion serio ta cuminsa cu claridad: ken ta responsabel, pa kico, y con e por wordo responsabilisa.
Ta tempo pa e gobierno pone ordo den su propio cas.
