Damnan cu limitacion di awa pa motibo di secura: “Santa Rosa ta splica referente alternativa con pa surpasa e temporada aki”

Departamento di Agricultura, Cria y Pesca- Santa Rosa, manera semper ta e caso durante e temporada aki, a bin ta premira e situacion di awa di Dam for di algun luna caba pa motibo di e falta di yobida na fin y comienso di ana. Hopi di nos productornan local ta depende riba e awa di Dam cual Santa Rosa ta entrega via truck y na un prijs subsidia door di Gobierno. Sin embargo, durante e ultimo  dianan aki, a tuma nota cu awa di dam ta cabando. Na e mes momento, por confirma cu e demanda pa awa di dam ta sigi halto pa e calor fuerte y e stof di Sahara cu tambe tin un impacto ariba hopi tipo di mata. Di otro banda, mester ta realistico, cu si Aruba no haya un bon yobida cu ta sirbi pa yena e damnan, ta dificil pa Santa Rosa por sigi cumpli cu e entrega diario di awa na nos Cunukero nan.

Otro factor den e ultimo dianan, cu nos por constata, ta cu pa motibo di e calor y temperatura ta halto ta hasi tambe cu na momento cubo ta muha bo matanan e awa ta evapora masha liher mes. Nos ta spera cu den e proximo dianan nos dilanti, awor cu e cambio climatico tin desaroyo nan poco usual cu locual e ta normalmente, cu poco awa por yobe pa por logra yena e damnan cu suficiente awa pa por sigi colabora cu nos productornan pa asina, nan por muha nan cultivo.

Departamento di Agricultura, Cria y Pesca Santa Rosa ta hasi un apelacion pa tene na cuenta cu e situacion aki. Tur nos clientela cu ta pidi truck di awa na cantidad halto y paga di adelanta, tene cuenta cu nos lo tuma pago pa entrega di awa cu truck na un cantidad limita. Motibo ta cu nos no por cumpli cu e demanda mientrastanto cu no tin awa. 

Ban spera cu e temporada nos dilanti por ta mas alentador pa asina trece poco awasero, pa nos por continua cu nos servicio di entrega di awa di Dam na nos clientela. Na e momentonan aki ta 4 Dam so ta disponi di awa pero cu tin un cantidad limita ta, esta; Dam di Tanki Leendert, Dam di Tanki flip, Dam di Rooi afo y Dam di Hooiberg. Pa e motibo aki tambe, cu nos ta hasi un peticion na tur persona, pa no tira sushi serca di e dam nan, especialmente no bestia morto y no busca awa di dam pa otro uso cu no ta pa muha mata of pa criansa di bestia. 

Santa Rosa tin tur comprension pa e situacion, cu gran parti di nos productornan local ta depende ariba awa di dam, pa nan por minimalisa e uzo di awa di WEB Aruba NV y evita gasto halto. Pero como un bon partner di Santa Rosa, nos kier recorda tur nos cunukero y criador nan ariba e opcion di por hasi peticion pa e awa subsidia di AWG 5.50 pa cube.  Esaki lo asegura cu boso mata/ cosecha no ta bay perdi of cu boso bestia nan no ta keda falta awa fresco pa nan bebe.

“Meter di WEB cu awa subsidia pa productor nan comercial of 65+”

Kiko ta e rekesitonan pa por hasi peticion pa e awa aki?

• E cliente tin un tereno di dominio publico cu un superficie mínimo di 400 m², cu ta completamente destina pa uso di agricultura, horticultura y ganaderia, ta eherce un negoshi agrario cu ta registra na registro di comercio di e Kamer van Koophandel en Nijverheid. Pa esnan cu ta registra na Santa Rosa y ta 65 plus.

• Bou di agricultura y horticultura explicitamente NO ta cai cultivo di flor, mata  ornamental of cultivo di cannabis.

• E cliente mester usa permanentemente mínimo 400 m² di e terreno menciona pa actividadnan di agricultura, horticultura y/of ganaderia. Tambe aki, cultivo di flor, planta ornamental of cannabis no ta includi.

• E awa cu ta wordo suministra pa medio di e “Meter di Agricultura Comercial” lo wordo entrega pa uso di agricultura  horticultura solamente via un sistema di irrigacion di goteo, cu linea di distribucion, cramchi di distribucion y slangnan lateral conecta cu slangnan di goteo of transpiracion. E cliente ta responsable pa cumpli cu un bon funcionamento di e sistema aki.

• E cliente ta obliga pa usa e awa proveniente di e meter di agricultura solamente pa su propio terreno y exclusivamente pa actividadnan di agricultura, horticultura y/of ganaderia. No ta permití en ningun forma pa usa e awa pafor di su propio tereno, ni pa cualkier otro motibo, ni door di e mes persona ni door di tercero.

• Den caso di uso di un tanki di buffer, e tanki di almacenahe mester tin un caminda accesibel pa e sistema di suministro di awa via e meter di agricultura, cu e conexionnan necesario pa yena e tanki for di ariba (“top fill”). E sistema mester ta hermeticamente sera sin leakage.

• For di Januari 2021, ta obligatorio pa permiti inspectornan autorisa di Directie LVV&M, Servicio Higienico y/of WEB Aruba N.V. pa subi su tereno pa control di higiene, inspeccion, recoleccion di informacion di produccion of tuma muestra di awa.

• Un cliente mester ta registra na DLVV. Na momento di registracion como agricultor of ganadero, e mester entrega un copia di su documento di huur, erfpacht comercial of declaracion di propiedad, hunto cu ID, y firma un declaracion na DLVV pa confirma cu e lo coopera cu DLVV tocante entrega di informacion y cifra mensual di produccion di su proyecto.

• DLVV lo ricibi cada 15 di luna un “Reporte di produccion” mensual di e cliente.

• Den caso cu un tereno huur wordo kita door di DIP of no ta wordo usa mas pa produccion agricola, e cliente mester notifica DLVV. Despues di esey, e no lo cualifica mas pa e tarifa especial pa agricultura of ganaderia. Den caso di cambio di terreno, DLVV mester wordo informa via carta of email na info@santarosa.aw.

• Si un cliente no cumpli cu un of mas di e regla menciona aki ariba, e no lo cualifica mas pa e tarifa special. DLVV lo informa WEB Aruba N.V. inmediatamente tocante terminacion di e derecho.

Na esnan cu ta practica agricultura mas pa hobby, por cuminsa na pensa con pa colecta awa di washmachine pa por muha bo cultivo. No lubida cu cu ta un cantidad considerabel di awa ta bai perdi na momento di laba paña. Purba na colecta esaki ya cu awendia e detergentenan ta biodegradabel. Ta na momento di laba e paña so e detergente tin efectividad. 

Un apelacion tambe na nos productonan cu ta disponi di meter di awa subsidia pa Agricultura, pa considera hasi uso di sistema di irrigacion pa hasi uso di e awa den un forma controla. Tambe corda controla bo sistema si tin leak pa e awa no bai perdi y muha caminda no mester. 

Importante ta pa mantene goot nan limpi y tankinan cla pa den caso di cualkier yobida, bo por colecta e awa. Corda pone tapa pa evita criadero di sangura.