Parlamentario Endy Croes a keda babuca cu e actuacion di Parlamentarionan di AVP-Futuro relaciona cu e caso Avestruz di ex minister di AVP, Benny Sevinger. Manera ta conoci 14 di april ultimo 5 Hues na Hulanda den Casacion a baha pisa riba e gang di criminal di AVP entre otro Benny Sevinger, Leoncita Arends di Canal 90 y Pieter Sussebeek padraso di minister Gerlien Croes.
E caso aki a wordo evalua den tur instancia di nos sistema hudicial:
- Un (1) Hues den Eerste Aanleg
- Tres (3) Hues den Hoger Beroep (Hof)
- Cinco (5) Hues den casacion
Cu suficiente prueba y “harde feiten”, e nuebe huesnan aki a haya Benny Sevinger y su gang culpabel di e corupcion mas grandi cu Pais Aruba a conoce den su historia. Locual ta hala atencion ta e parlamentarionan (nobo) di AVP-Futuro. Aunke nan ta pretende di hiba un “politica moderno”, nan no a bisa ni UN palabra riba e tema aki te cu awe. Pueblo tambe ta babuca cu e actuacion aki. Shame!
Un siman prome cu e sentencia Parlamentarionan tabata activo:
Un siman prome cu e sentencia di caso Avestruz Parlamentario nan di AVP-Futuro tabata activo cu un strategia pa desvia e atencion di e siman crucial cu tabata na caminda unda Casacion a condena e gang criminal di AVP. Pueblo por corda bon con e fraccion di AVP-Futuro a “gara” na un rapport di Algemene Rekenkamer riba e jaarrekening di aña 2020, publica den luna di maart. Ta importante pa aclaria cu e pasashi den e rapport aki tocante FASE ta simplemente un repeticion di argumentonan cu Rekenkamer a publica caba for di aña 2022. No tin niun dato nobo, sino un intento pa recicla informacion bieu pa crea un cortina di huma. Akinan, e parlamentarionan panlefi manera Bermudez, Hart, Kelly, Heyliger y Jennifer, pa nombra algun, tur a graba un cantidad di video y “reels” pa comenta riba e rapport aki.
Lamentablemente, e mensahe final di e parlamentarionan aki ta masha cla: nan ta exigi pa Gobierno cobra tur e 15 mil cuidadonan cu a ricibi ayudo di FASE e placa aki bek. Nos ta lamenta profundamente e pensamento mesquino aki di e parlamentarionan “chiripero” di AVP-Futuro. Purba ataca un ayudo social cu a bay pa miles di famia den tempo di crisis, djis pa desvia atencion di e condenan di corupcion den nan propio seno, ta simplemente ridiculo!
No kier pa Gobierno kita terenonan pero si kier cobra FASE bek:
Parlamentario Endy Croes, den nomber di Fraccion di MEP, a presenta un mocion fuerte durante e reunion publico di dia 16 di april ultimo. Esaki a bin inmediatamente despues cu e sentencia di e cinco (5) Huesnan di Casacion a keda conoci, confirmando cu e criminalnan di AVP mester bay KIA pa sinta nan sentencia.
E mocion presenta pa Parlamentario Croes tabata tin un meta cla:
- Pidi Gobierno pa investiga tur e terenonan caminda a keda proba cu Benny Sevinger (AVP) a haci negoshi ilegal cu nan.
- Facilita pa Gobierno por “trek in” e terenonan aki.
- Percura pa Pais Aruba haya e terenonan aki bek y duna nan na e pueblo cu berdad tin mester.
Pa sorpresa di hopi, e fraccion di AVP-Futuro a opta pa vota CONTRA e mocion aki. Cu un total di 11 voto contra, e mocion a keda rechasa y desaproba den Parlamento. E 11 parlamentarionan di AVP-Futuro kier cobra 15 mil ciudadano cu a ricibi FASE den e momentonan mas dificil di pandemia, ora hende a perde trabou y Gobierno a brinda un man pa yuda. E mesun 11 parlamentarionan aki ta aproba e corupcion di siglo di AVP y ta opta pa laga pueblo sin tereno.
“AVP-Futuro a certifica e robo historico di Pais Aruba. Esaki ta e supuesto ‘politica nobo y moderno’ cu nan ta predica. Mientras nan ta persigui e ciudadano humilde pa FASE, nan ta proteha e bandidonan cu a horta tereno di pueblo.” Parlamentario croes a conclui.
