Recientemente, Minister di Husticia, Integracion, Transporte Publico y Energia mr. drs. Arthur Dowers, den colaboracion cu un ekipo independiente di investigado, a anuncia cu lo inicia un encuesta pa siña mas tocante dicon hende ta hunga wega di placa y ki impacto esaki tin riba nan mes y riba comunidad. E iniciativa aki ta forma parti di un esfuerso pa evalua tanto e efectonan positivo como negativo di wega di placa na Aruba, pa asina por brinda sosten adecua na esnan cu tin mester di dje.
E encuesta ta tuma luga for di 30 di april te cu 8 di mei 2026, y lo cubri diferente tema relaciona cu wega di placa, manera tipo di wega cu ta hunga, con frecuente hende ta participa, y cualkier otro consecuencia cu nan a yega di experencia, sea positivo of negativo. E informacion cu ta colecta lo yuda Gobierno di Aruba tuma mihor decisionnan riba nivel di maneho, legislacion y programanan pa comunidad.
Periodo: 30 di april – 8 di mei 2026
E encuesta aki ta tuma luga na diferente punto strategico manera na centronan comercial, supermercado, casino, puntonanan di benta di loteria etc. na unda un grupo di studiante di Universidad di Aruba lo acerca comunidad cu un lista di pregunta. Por identifica e encuestadonan cu lo ta bisti cu uniform cora y un identificacion. Participantenan por yena e encuesta den privacidad na e diferente puntonan rond di Aruba.
Privacidad: E encuesta ta completamente anonimo y lo trata tur informacion totalmente cu discrecion pa e proposito di e investigacion y lo no haci mencion di ningun nomber.
Independencia: E encuesta ta ehecuta pa un team independiente di investigado cu den pasado recien a haci un encuesta similar na Corsou, Sint Maarten y Islanan BES.
Cu bo participacion, bo ta contribui na un miho comprendemento di wega di placa na Aruba. Tur hende ta bonbini pa participa, sea bo ta hunga hopi, de bes en cuando of nunca. Bo opinion ta importante pa yuda traha na un futuro mas saludabel y sigur pa Aruba.
