Mientras e entusiasmo p’e maximo cita di futbol ta crece rond mundo, e organo rector di futbol, FIFA, ta enfrenta un reto grandi den e mercadonan mas grandi di Asia. A keda confirma cu e negociacionnan p’e derechonan di transmision na India y China ainda ta den aire, faltando apenas cinco siman p’e pito inicial zona dia 11 di juni proximo.
E incertidumbre aki ta pone presion riba e organisacion, considerando cu e dos nacionnan aki ta representa e poblacion mas grandi di mundo y un pilar fundamental p’e strategianan comercial di e torneo.
Negocionnan den secreto
Segun fuentenan oficial a informa e agencia EFE e diamars aki, FIFA a logra cera acuerdonan exitoso den mas di 175 teritorio globalmente. Sinembargo, e bashi den e mercadonan Asiatico ta keda bisto.
“E discusionnan na China y India tocante benta di derechonan di medio p’e Copa Mundial di FIFA 2026 ta den curso y mester keda confidencial den e etapa aki,” FIFA a señala den un comunicado cortico ora a wordo consulta.
E panorama na India: Fusion y baloracion
Na India, e retraso tin hopi di haber cu e cambionan structural den e industria di media local. E fusion recien entre e gigantenan Reliance y Disney a crea un panorama nobo di monopolio y decisionnan corporativo.
Ademas, tin un disputa silencioso riba e balor di e derechonan. P’e Mundial di Qatar 2022, e balor a yega na 60 miyon dollar, pero fuentenan den e sector ta indica cu e exigencianan economico di FIFA p’e edicion di 2026 no ta cuadra ainda cu e ofertanan riba mesa. Di otro banda, e cadena Sony, cu semper ta un fuerte competidor, a opta pa keda den silencio absoluto riba su posibel participacion.
China: Un tardansa poco comun
Pa loke ta trata China, e situacion ta straño p’e observadornan. Historicamente, e cadena estatal CCTV ta sigura e derechonan cu hopi luna di anticipacion p’asina nan por bende nan espacionan publicitario cu tempo. E falta di un anuncio oficial n’e altura aki di e aña ta lanta interogante riba e condicionnan di e contract.
Un mercado digital dominante
E motibo pakico e acuerdonan aki ta vital pa FIFA ta bisto den e cifranan di e ultimo Mundial:
- Impacto Global: China y India a representa hunto 22,6% di e alcance digital di henter e torneo na 2022.
- Consumo na China: Casi mita (49,8%) di tur e oranan cu mundo a pasa mirando futbol riba plataformanan digital y social a bin di China.
- Crecemento na India: Aunke e television lineal a representa 2,9% di e alcance global, e mercado di streaming na India ta esun cu mas a crece, birando un mina di oro pa publicidad digital.
Cu e conteo regresivo ya den marcha, e siguiente dianan lo ta decisivo pa sa si e fanatico di futbol na e dos paisnan aki lo por disfruta di e fiesta mundialista sin interupcion.
