Dia 3 mei a ser proclama como Dia Mundial di Libertad di Prensa na 1993 pa Asamblea General di Nacionan Uni, siguiendo un recomendacion di e Conferencia General di UNESCO.
E fecha a ser escogi pa coincidi cu e aniversario di e Declaracion di Windhoek, den cual representantenan di medionan di comunicacion africano cu tawata participa den un seminario organiza pa UNESCO den e capital di Namibia, a crea un documento den cual a formula e principionan di e libertad di prensa.
Segun estableci pa articulo 19 di e Declaracion Universal di Derechonan Humano, e libertad di expresion ta un derecho fundamental: “Tur individuo tin e derecho di libertad di opinion y expresion; e derecho ta inclui e derechonan di no ser molesta a causa di bo opinion, investiga y recibi informacion y opinion, y e difusion di esakinan sin limitacion di frontera, y mediante cualkier medio di expresion”.
Teniendo e derecho aki na cuenta, Dia Mundial di Libertad di Prensa ta un oportunidad pa recorda e gobiernonan cu ta necesario respeta libertad di expresion y pa refleha riba e problemanan di libertad di prensa y e etica profesional. E ta un oportunidad pa:
- Celebra e principionan fundamental di libertad di prensa.
- Evalua e situacion di libertad di prensa na mundo.
- Defende e medionan di comunicacion contra atentado riba nan independencia.
- Rindi homenahe na periodista cu a perde nan bida cumpliendo cu nan deber.
2026 TEMA: DUNANDO FORMA NA UN FUTURO IMPULSA PA PAZ
(SHAPING A FUTURE AT PEACE)
Creando, dunando forma na y configurando un futuro impulsa pa paz.
Esaki lo por ser logra mediante acceso na informacion veridico, dunamento di cuenta den sector publico y priva, dialogo y confianza, libertad di prensa y un prensa independiente, cual tur ta contribui na establece paz, recuperacion economico, desaroyo sostenibel y respeta derechonan humano y principionan di un estado di derecho democratico.
Segun e World Trends Report 2022-2025 di UNESCO, libertad di prensa a conoce su pior caida desde 2012. E deterioro aki por ser compara cu e periodonan mas inestable di siglo 20, esta e dos gueranan mundial y e periodo di Guera Frieuw entre Union Sovietico y e mundo occidental.
Manipulacion di informacion, incluyendo e uso di intelligencia artifical dor actornan maligno, ta debilitando confianza y siguridad nacional. Y na e mesun momento medionan di comunicacion independiente ta enfrentando un situacion di fragilidad economico.
Auto-censura a crece cu mas di 60%, impulsa pa miedo pa represaya, menazanan en linea, intimidacion hudicial y presion economico.
Dia Mundial di Libertad di Prensa 2026 ta ofrece un momento critico pa reafirma libertad di expresion y pa alinea periodismo, tecnologia (incluyendo intelligencia artificial) y actornan di derecho humano pa fortifica ecosistemanan di informacion pa futuro.
Pa enfrenta e inundacion di desinformacion den e ecosistema digital informativo, UNESCO a laga traha un manual titula “Journalism, fake news & disinformation: handbook for journalism education and training” na 2018 y na 2023 a lanza “ The Guidelines for the governance of digital platforms” (Guia pa e gobernancia di plataformanan digital). Si implementa den nan totalidad, e normanan y principionan aki lo empodera tur partidonan interesa pa pone den marcha un sistema di gobernancia cu por promove e libertad di expresion y na mesun momento atende cu asuntonan externo negativo.
DIA MUNDIAL DI LIBERTAD DI PRENSA, SITUACION DI ARUBA
Na Aruba dos iniciativa ta dunando contenido na e proposicion den e tema di 2026 pa Dia Mundial di Libertad di Prensa.
E promer inicitiativa ta di e medio online Amigoe Aruba cu awor ta ofrece un servicio na unda por manda via email bo comunicado di prensa cual cu uso di inteligencia artificial ta ser traduci na holandes, haciendo un resumen di e contenido di e comunicado den un forma na unda ta duna asistencia den e tono, structura y escogencia di palabra pa crea un resultado profesional cu ta ser poni online, accesibel pa tur lector na mundo cu ta domina holandes.
Mediante e servicio aki ta duna contenido na crea un plataforma accesibel pa tur hende pa expresion liber y critico asina creando e balance necesario den e discurso publico.
E di dos iniciativa ta di Rainbow Warriors Core Foundation cu despues di hopi aña di preparacion ta bay lanza un programa pa crea e infrastructura digital pa e utilisacion di Papiamento den ciencia, tecnologia y areanan professional. Esaki ta encera entre otro creacion di diccionario y instrumentonan linguistico computacional pa facilta uso di Papiamento riba tur equipo digital.
