Durante e conmemoracion di jaarlijkse dodenherdenking na Aruba, parlamentario Eduard Pieters di fraccion di PPA no a keda djis den algo simbolico. El a uza e momento pa trece un mensahe cu ta bay mas leu cu memoria historico: sacrificio sin accion awe no tin balor pa mañan.
Durante un ceremonia yena cu respet y reflexion, e figura di Boy Ecury, un yiu di tera cu a entrega su bida pa libertad durante Di Dos Guera Mundial, a bira e punto di salida pa un analisis politico profundo. Pa Pieters, Ecury no ta solamente un heroe di pasado, pero un spiel pa liderazgo di presente. “Ta facil pa para na banda y critica. Pero ta mas dificil pa drenta den ‘ring’ y tuma e decisionnan cu tin consecuencia,” Pieters a indica, conectando directamente e sacrificio di pasado cu e responsabilidad di e lidernan di awe.
Sacrificio di ayera, falta di decision awe
E mensahe di Pieters tabata cla y sin filtro: Aruba no ta falta di talento, ni di potencial. Loke ta falta, segun dje, ta curashi pa tuma e decisionnan dificil. Den un tempo, unda e problemanan ta acumulando, manera presion financiero, sostenibilidad, infrastructura y gobernacion, el a alerta cu liderazgo no por keda limita na discurso. “Herencia di heroe, manera Boy Ecury, no ta pa conmemora un biaha pa aña so. Mester biba di dje den cada decision cu nos tuma pa nos pais,” el a expresa.
Un Reino construi riba sacrificio, no conveniencia
Pieters tambe a conecta e conmemoracion cu e realidad di Reino Hulandes awe. El a enfatisa cu libertad, autonomia y respet entre e paisnan no a bin facil, pero a conkist’e cu sacrificio. Y p’esey mes mester proteg’e y defend’e cu mesun determinacion.
Un Reino fuerte no ta construi riba conveniencia politico of presion institucional, pero riba respet mutuo, responsabilidad comparti y liderazgo, cu ta e columna vertebral.
Un mensahe pa generacion nobo
Un di e puntonan mas impactante tabata su yamada na e hobennan. Pieters ta recorda nos hobennan, cu progreso semper ta exigi sacrificio. “Bida no semper ta facil ni ‘color de rosa’. Bida ta cuestion di scoge pa haci loke ta corecto, aunke e por ta dificil,” el a enfatisa, poniendo cla cu futuro di Aruba ta depende di e decisionnan cu e generacion actual y esun di futuro lo tuma.
Na final Eduard Pieters a subraya cu un mensahe cu ta resona mas leu cu djis e momento ceremonial aki: conmemoracion sin actua, ta algo bashi. Pa Pieters, e legado di Boy Ecury ta uno di accion, no di silencio. Y esaki ta e reto pa Aruba awe: no djis honra pasado, pero tene e mesun curashi pa defende futuro.
“Si nos kier un pais mas fuerte, nos mester tuma e decisionnan mas fuerte,” Eduard Pieters a conclui.
