Diamars mainta, Parlamento a trata den un reunion publico e cuenta anual (Jaarrekening) di aña 2020 di Pais Aruba, cu e obhetivo pa formalisa y establece e cifranan di e aña presupuestario ey. Den cual e coalicion di AVP-Futuro a vota na fabor, aprobando asina e maneho di crisis hiba pa Gabinete Wever-Croes.
2020: E aña di pandemia
Dia 13 di maart 2020 Aruba mester a cera su portanan: hotelnan y aeropuerto a cera y e economia di nos pais a bay plat. Segun cifranan di SVB, di e 52.000 trahadonan cu tabatin e tempo ey, alrededor di 37.000 tabata den riesgo di perde nan trabou. Gabinete Wever-Croes a enfrenta un crisis historico y sin precedente, den un momento cu e pandemia di COVID-19 tabata cobrando miyones di bida rond mundo.
Expertonan a elabora un presupuesto di emergencia cu gastonan total di 1.8 biyon florin contra entradanan di apenas 1.1 biyon florin, generando un deficit financiero di 739 miyon florin. Lamentablemente, e fraccion di AVP a vota “contra” e presupuesto aki na aña 2020, oponiendo su mes directamente na e ayudo di emergencia pa e trahadonan afecta.
Sosten financiero di 341.5 miyon florin
Gobierno a introduci mesora varios instrumento di sosten financiero pa yuda e 37.000 trahadonan afecta y e companianan chikito y mediano (MKB):
• FASE: 42.8 miyon florin pa mas di 12.000 persona den necesidad.
• MKB-Steun: 22.9 miyon florin pa apoya e companianan chikito y mediano.
• Loonsubsidie: 275.5 miyon florin pa salvaguardia e empleonan.
Pa loke ta trata e instrumento di FASE, Algemene Rekenkamer Aruba (ARA) a remarca cu na 2020 no tabatin un base legal ainda pa haci e pagonan aki. Gobierno mester a scoge entre scapa bida di hende of warda te ora traha un ley. Gabinete Wever-Croes a scoge pa scapa bida di e ciudadanonan mesora otorgando e ayudo, mientras a traha riba e ley. E ley di Noodhulp FASE a keda cla na april 2022 y a keda aproba den Parlamento dia 12 di juli 2022, legalisando tur e pagonan. A pesar di e diferente opinionnan legal riba e formalisacion aki, Fondo Monetario Internacional (IMF) a reconoce den nan rapport cu Gobierno a actua rapido y cu e sosten brinda a yuda scapa bida di hende.
Cambio di postura y mocion di Futuro pa cobra ayudo bek
Fo’i luna di maart ora e rapport di ARA riba e Jaarrekening 2020 a yega Parlamento, parlamentarionan di AVP y Futuro a haci mofa y a malinterpreta e informacion, buscando pa duna e impresion cu Gabinete Wever-Croes a actua di un manera incorecto ora di aproba e presupuesto y duna ayudo na e ciudadanonan den necesidad.
Sinembargo, diamars ultimo e mesun parlamentarionan aki di e fraccionnan di AVP y Futuro a cambia di postura y a vota “VOOR”, aprobando asina e Jaarrekening 2020 y consecuentemente e maneho di crisis cu Gabinete Wever-Croes a hiba den e aña ey.
Pa purba scapa cara despues di a critica sin base, Parlamentario Lindor (Futuro) a presenta un mocion, cu a keda aproba pa e coalicion di AVP-Futuro, pa laga haci un investigacion cu e meta pa cobra bek e ayudo di FASE cu a wordo otorga na e beneficiarionan, entre nan taxistanan, trahadonan di hotel y mas di 12.000 persona.
Aki nos ta mira e cara real y e falta di empatia y sensibilidad di e politiconan aki: nan ta bay pidi voto na cas di e trahadonan, pero despues ta tuma decisionnan cu ta castiga y perhudica e mesun pueblo cu mas tabatin mester di ayudo durante e pio crisis economico y di salud di nos pais.
Awor e politiconan aki kier bin cobra e ayudo ey bek? Esaki ta e ‘pago’ cu nan tin pa e 12.000 ciudadanonan aki!
