Aruba Conservation Foundation (ACF) unabes mas a participa den e evento anual di Open Dag Marinierskazerne basa riba un colaboracion di hopi aña, cu un compromiso comparti di conecta cu e comunidad y crea un espacio pa intercambio di informacion y conocemento.
Durante henter e dia, ACF e duna bon bini na un fluho di bishitante na su stand interactivo, unda cu muchanan y hende grandi a mustra interes di conoce mas di Aruba su naturalesa. Di preguntanan curioso pa combersacionan cu mas profundidad, e interes pa comprende e medio ambiente y naturalesa di Aruba tawata grandi.
Bishitantenan por a conoce di cerca e diferente proyectonan di restauracion cu ACF tin andando. Un seccion tawata dedica na e trabounan di restauracion di rifnan di coral cu diferente rifnan articifial cu a wordo poni den e diferente areannan di Parke Marino Aruba. Otro seccion tawata dedica na e trabounan di restauracion di mangel, mustrando con e canalnan di mangel den e area di Spaans Lagoen ta wordo restaura pa drecha e fluho di awa na e sistema di mangel. Un ultimo session tawata enfoca riba Aruba su matanan nativo, unda cu a trece un variedad grandi di matanan cu ACF ta cultiva y crece den su propio green house na Parke Nacional Arikok y cu pronto lo wordo planta den naturalesa di Aruba como parti di ACF su plan di restaura habitatnan cu matanan nativo den areanan protegi.
ACF kier gradici Marinierskazerne pa e colaboracion continuo y pa duna ACF un espacio durante Opendag pa asina conecta den un manera interactivo cu e comunidad cu ta di bishita.
Probechando di e curiosidad y interes demonstra durante e dia aki, ACF kier a extende un invitacion na e comunidad di Aruba pa tuma parti den e di dos session di aña 2026 den su programa informativo di Naturalesa ta Papia: Encuentro di Conocemento cu lo enfoka riba e tema di matanan nativo.
E sessionan lo tuma lugar lo siguiente:
- 26 mei 2026 – Centro di Bario Dakota di 6:45PM pa 8:45PM
- 28 mei 2026 – Teresita Center San Nicolas di 6:45PM pa 8:45PM
Participacion ta completamente gratis y tur cu kier participa por registra usando e siguiente link:
Link: NATURALESA TA PAPIA ta presenta: Matanan Nativo – Fill out form
Naturalesa ta papiando y momentonan asina ta con hende por mustra cu nan ta scuchando.
Pa mas informacion por bishita www.acf.aw of email info@acf.aw.
