Minister Herdé tabata presente den Parlamento pa trata e presupuesto 2026 di DOW (Dienst Openbare Werken). Un presupuesto cu nos a spera lo a trece alivio pa pueblo, specialmente pa e miles di automobilistanan cu ta uza nos careteranan diariamente. “Esey lamentablemente no tabata e caso, sino mas bien un ‘Wishful thinking’,” Oduber a expresa.
Surplus miyonario pero camindanan na werki
Bo lo a pensa cu un gobierno cu tin abundancia di placa, cu un surplus di 500 miyon florin, lo tabatin oido pa esnan cu ta sclama pa un miho infraestructura. Parlamentario Oduber a resalta e realidad amargo di e automobilistanan cu mester core diariamente riba camindanan di tera y careteranan yen di buraco. ‘Nos ta papia di camindanan na werki cu ta daña tire, rim y shocks di e automobilista. Nos a spera hopi mas comprension di parti di gobierno, mirando e cantidad di placa cu nan tin pa dispone di dje,” Oduber a expresa.
E contrast ta bisto: tur siman Minister Wever ta gaba con bon e situacion financiero di pais Aruba ta y con nos credit ratingsnan a subi. Sinembargo, Oduber ta cuestiona dicon e “bon situacion” aki no ta traduci den alivio pa e pueblo.
Di 18 Miyon pa un Miserabel 3.5 Miyon
Loke Parlamentario Oduber ta considera mas condenabel, ta e echo cu Gobierno a kita 18 miyon florin cu tabata destina pa asfalta e diferente careteranan di Aruba. Segun e Parlamentario, e unico argumento cu e minister “pinch hitter” Herdé tabatin pa e decision aki, ta cu tin un minister nobo y un maneho nobo. Pa ta exacto, Parlamentario Oduber a recorda cu dia 24 di februari 2025, DOW a tene un conferencia di prensa caminda a anuncia cu ta bay inverti e 18 miyon florin cu Gabinete Wever-Croes 2 a presupuesta, pa drecha diferente camindanan. Sinembargo, despues di e cambio di gobierno, Minister Herde a dicidi di KITA e fondo aki.
Ora a pensa cu lo a kita e suma ey pa pone mas, Minister Herdé a bin pone un miserabel 3.5 miyon florin pa asfalt pa aña 2026. Oduber a enfatisa cu den un pais cu ta produci 7 biyon florin y un Gobierno cu tin un surplus di 500 miyon, esaki ta bergonsoso. Esaki ta mas bien un falta di respet pa pueblo, pa pone solamente 3.5 miyon florin pa drecha camindanan, un suma cu ta yega pa apenas 7.5 kilometer di caminda.
“Esaki ta un falta di respet! Mientras pueblo ta sclama pa miho caminda, gobierno ta inverti placa unda nan kier y no unda e necesidad real ta. Un surplus di 500 miyon y bo ta pone 3.5 miyon pa asfalta? Esey ta un bofta den cara di pueblo!,” Oduber a conclui
