Parlamentario Bermudez ta informa cu, prome cu a trata e Presupuesto 2026 di DOW, Parlamento di Aruba a haya oportunidad pa haci pregunta por escrito. Tur fraccion a haci uzo di e derecho aki. Gobierno/DOW a tuma nan tempo pa contesta e preguntanan debidamente y na un manera amplio.
Durante tratamento di e Presupuesto 2026 di DOW diamars ultimo, tur fraccion den Parlamento a haci preguntanan adicional. Bermudez a tuma nota cu oposicion tabata mustra cu nan ta na fabor di e proyectonan y mehoracion cu tin programa den e presupuesto di DOW.
Un di e puntonan cu a bin dilanti for di e fraccionnan di oposicion tabata e 18 miyon florin cu e gabinete anterior a pone pa DOW den un najaarsnota. Lider di fraccion di MEP mes a declara cu “tabatin un meevaller ora a pone placa pa DOW”.
Segun Bermudez, esaki ta mustra claramente cu nan nunca tabata dispuesto pa asigna suficiente fondo pa DOW. Pasobra si di berdad bo ta preocupa pa nos camindanan, bo mester aloca e recursonan den e presupuesto regular y no warda pa wak si tin meevaller pa despues sali duna algo.
Ora cu gabinete AVP-FUTURO a tuma asiento, a constata cu lamentablemente e gabinete anterior a laga un debe di 5.4 miyon florin y cu e proveedornan di asfalt a indica cu, nan lo por a suministra solamente asfalt pa patch algun caminda.
Segun Bermudez, esaki ta mustra cu e gabinete anterior tabata mas enfoca riba papia di “surplus” cu riba paga e debenan necesario pa DOW por haya asfalt y sigui yuda nos comunidad cu mantencion di camindanan.
Awor cu oposicion ta trata di presenta nan mes como defensornan di e estado di nos camindanan, Bermudez ta puntra unda nan tabata ora cu tabatin necesidad pa exigi e ex gabinete Wever-Croes pa paga e debe di 5.4 Miyon y sigura cu Aruba por haya asfalt.
Segun Bermudez, e momento ey tur tabata drumi\keto y niun no a sali publicamente pa pone presion riba nan propio gobierno. Bermudez ta considera cu un parlamentario mester semper pone interes di pueblo prome cu e interes di partido. Segun Bermudez, e actitud di algun miembro di oposicion ta mustra falta di respet pa e comunidad.
Loke tambe a sorprende hopi hende tabata cu durante e tratamento di e presupuesto, algun parlamentario di oposicion a mustra preocupacion tocante vacaturanan na DOW, training di empleadonan, eficiencia cu automatizacion por trece, compartimento di informacion (GIS-Layers) cu otro departamento, y tambe cual proyectonan no a keda cla den 2025 y lo continua den 2026 etc., etc. Sin embargo, ora a yega momento pa vota riba e presupuesto di DOW, tanto MEP como PPA a vota contra.
Segun Bermudez, e excuus principal tabata cu solamente 3.5 miyon florin tabata destina specificamente pa asfalt, mientras cu minister a splica varios biaha cu e suma total cu lo ta disponibel pa DOW e aña aki lo ta 19.4 miyon florin.
Apesar di e splicacionnan, oposicion a sigui uza e cifra di 3.5 miyon como argumento principal pa vota contra e presupuesto. Segun Bermudez, esaki ta pa crea confusion den pueblo y no ta representa e realidad.
Bermudez ta enfatisa cu e presupuesto di DOW no ta limita solamente na asfalt. E ta inclui tambe inversionnan den mehoracion di servicio, eficiencia, infrastructura y ehecucion di proyectonan importante pa Aruba.
Segun Bermudez, si bo no ta dispuesto pa aproba e recursonan necesario pa DOW por haci e mehoracionnan necesario, e ora bo no por sigui critica cu proceso manera peticion di permiso di construccion ta tarda mucho. Esey ta hipocrecia.
Bermudez kier sa di oposicion: “Boso ta pro progreso di Aruba, si of no? Pasobra te cu awo ta mustra cu ta contra!
