E soño di Dani Carvajal pa fungi como un di e pilarnan di Spaña den e proximo Copa Mundial 2026 a wordo interumpi. E hungado di Real Madrid, cu a bisti e uniform di “La Roja” na 52 ocasion, no a wordo inclui den e pre-lista di 55 hungado cu e bondscoach Luis de la Fuente a entrega dialuna. Esaki ta nifica oficialmente cu Carvajal lo no biaha p’a ‘e torneo, ya cu e lista final di 26 hungado mester sali obligatoriamente for di e seleccion inicial aki.
Lesion: E pio enemigo di Carvajal
Segun fuentenan di EFE, e lateral derecho tabatin e Mundial aki como su meta principal pa e temporada. Sinembargo, su caminda pa recuperacion tabata yen di obstaculo:
- October 2024: Un lesion grave di ligamento crusa (ACL) a cambia su carera completamente, lagand’e 238 dia for di seleccion.
- Temporada actual: Carvajal no a logra haya continuidad. E mester a bolbe drenta sala di operacion dia 28 di october ultimo pa un artroscopia na su rudia opera.
- Ultimo lunanan: Un lesion muscular y, mas recientemente, un fisura na su pia a pone cu e no por a gara e ritmo necesario. E aña aki el a hunga solamente 885 minuut den 20 partido.
Cu esaki, Carvajal ta keda sin e unico trofeo cu falta den su vitrina personal, despues di a gana e Nations League (2023) y e Eurocopa (2024).
Presencia di Real Madrid y e seleccion
A pesar di e ausencia di Carvajal, Real Madrid si tin tres representante den e pre-lista di De la Fuente:
- Dean Huijsen (defensa central) – Esun cu mas chens di drenta e lista final.
- Fran García (lateral robes).
- Gonzalo García (delantero).
Reglanan estricto di FIFA
E seleccion di 55 hungado cu a wordo entrega na FIFA ta vinculante. Segun e normativa nobo, si un hungado lesioná prome cu e torneo, e coach mester scoge un reemplasante obligatoriamente for di e lista aki, te cu un maximo di 24 ora prome cu e prome partido.
Fechanan clave pa Spaña:
- 25 di mei: Luis de la Fuente lo anuncia e lista final di 26 hungado.
- 30 di mei: E seleccion lo cuminsa entrena na Las Rozas.
- 15 di juni: Spaña ta debuta den Mundial contra Cabo Verde.
