E oficina di keho di Horacio Oduber Hospital (HOH) ta bolbe haya su mes bou di candela debí na un falta di eficiencia y tardansa den e tratamento di casonan di negligencia. Ruthy Vrieswijk, kende ta den un lucha constante pa haya husticia pa su mama, Petronilia Tromp (QEPD), a bati alarma riba e manera “langdradig” y “laaf” cu e hospital ta atendiendo kehonan serio.
Shete luna di espera y sin resultado
E caso tin su origen den un supuesto negligencia medico cu a tuma luga den luna di september 2025. Despues di a participa den un hoorzitting (audiencia), e famia a keda warda riba un carta oficial cu e resultado di e comision di keho. Sinembargo, ya a pasa shete luna y e contesta ainda no a yega.
Den un corespondencia recien, un representante di hospital a pidi disculpa pa e tardansa, admitiendo cu e comision tin un “retraso grandi” den e tratamento di kehonan y den trahamento di e decisionnan oficial (beschikking). Segun e hospital, e documento ta den revision y mester pasa ainda pa e Hunta di Directiva (RvB) pa e decision final.
Falta di respet p’e pashet y nan famia
Pa sra. Vrieswijk, e excuusnan aki no ta aceptabel mas. El a califica e situacion como un falta di respet total pa nos grandinan. “Boso a lubida con pa pone resultado riba papel? Boso a lubida con ta type un carta?” Vrieswijk a cuestiona den su contacto cu e hospital, mustrando su desapunto den e seriedad di e institucion.
Ademas, Vrieswijk a trece padilanti e preocupacion riba e plannan di fusion cu INSAM (Instituto Medico San Nicolas). Segun su opinion, si HOH no por “handle” nan mesun oficinanan di keho y nan mesun trabaonan diario, ta logico cu nan lo no por carga cu e responsabilidadnan di INSAM tampoco.
Un yamada pa transparencia
E famia a duna di conoce cu nan no lo keda keto y cu nan ta dispuesto pa bolbe papia cu prensa pa informa e comunidad, specialmente e grandinan, riba loke ta pasando den e instituto di salud mas grandi di e isla. Mientrastanto, e espera pa un carta oficial ta sigui, lagando un duda grandi riba e transparencia y e consenshi di e comision cu mester percura p’e bienestar di e pashent.
