Grupo di Medionan di China (CMG), matriz di e cadena estatal CCTV, a logra obtene e derechonan di transmision pa e Mundial di futbol 2026. E decision aki a bin despues di simannan di negosacion marca pa diferencianan economico y apenas un paar di ora despues di e bishita di e secretario general di FIFA, Mattias Grafström, na Peking.
E acuerdo a wordo anuncia diabierna den forma conhunto pa CMG y FIFA. Fuera di e torneo di 2026, e aliansa nobo ta inclui tambe e Mundialnan masculino di 2030 y esnan femenino di 2027 y 2031.
Segun e terminonan publica, e grupo estatal a haya e derecho exclusivo di transmision y sublisencia pa China continental riba television habri, plataformanan di pago, internet y aparatonan mobil.
Un paar di ora prome, medionan Chines a informa cu Grafström tabata encabesa un delegacion di FIFA na Peking cu e meta principal pa papia cu e Asociacion Chines di Futbol (CFA) y CCTV tocante cooperacion y e derechonan di television. Durante su estadia, el a reuni cu e presidente di CFA, Song Kai, y a bishita e Estadio di Trahadonan na Peking.
Segun fuentenan local, e acuerdo pa e Mundial cu lo tuma luga na Merca, Canada y Mexico a wordo cera pa rond di 60 miyon dollar. E cifra aki, maske no a wordo confirma oficialmente, ta hopi mas abou cu e sumanan cu a wordo pidi inicialmente. Informacionnan anterior ta indica cu FIFA a solicita entre 250 pa 300 miyon dollar na principio, un cantidad cu despues a baha bay entre 120 pa 150 miyon, te ora a yega na e punto final.
Cera e acuerdo aki ta un alivio pa FIFA, considerando cu China y India tabata e dos paisnan mas pobla cu ainda tabata falta un operador confirma pa e Mundial, faltando menos cu un luna pa e apertura. Esaki a pesar cu e dos nacionnan aki a representa 22.6% di e alcance digital global durante e edicion di Qatar 2022.
E Mundial di 2026 lo wordo hunga entre 11 di juni i 19 di juli. Esaki lo ta e prome biaha cu 48 seleccion ta participa, cu un total di 104 partido. China no lo participa den e edicion aki, i analistanan local ta menciona cu e orarionan di e partidonan tabata un factor cu tabata haci e atractivo comercial mas dificil pa e pais asiatico.
