La Cabana cu orguyo a celebra e mamanan increibel di nos isla, hunto cu miembronan di su organisacion, durante un Desayuno di Dia di Mama cual tabata un evento cariñoso yena di aprecio , conexion y alegria.
Empleadonan a reuni pa un desayuno delicioso, c’un tremendo preparacion di parti e team culinario, creando e tono perfecto p’un mainta dedica na e celebracion na tur mama stima.
E momento cu a resalta mas di e evento tabata eleccion di Mama di Aña 2026, un honor cu orguyo otorga na Jeanette Brooks.
Jeanette a keda reconoci pa su dedicacion incondicional, fortalesa, compasion, como tambe inspiracion cu el a trece tanto como mama y tambe colega.
Su compromiso cu famia y trabao ta berdaderamente refleha e balornan cu La Cabana ta sostene. Jeanette a haya su reconocemento bon mereci, manera tambe gradicimento pa ta un ehempel na tanto colega n’e resort.
Durante e celebracion, a entrega varios premio di rifa n’e ganadonan – agregando emocion y sonrisa henter e mainta. Un detaye special di aprecio a bini den forma di cada mama ricibiendo un rosa cual ta simbolisa gratitud y admiracion di e resort pa tur loke nan ta haci.
Jerrino Bass cu su banda a percura pa tin un bon ambiente musical haciendo e celebracion ainda mas memorabel.
Ta gradici Comision Social y henter team di HR pa organisa un evento asina bunita y bon ehecuta. For di detayenan clave te cu e ambiente caluroso, c’un programa atractivo – a haci cu e bunita trabao a trece henter e celebracion na bida. La Cabana Beach Resort & Casino ta orguyoso di honra e damanan aki cu ta duna tanto – na cas, trabao, cu tur nan amor y pasion.
