E regreso inminente di Manuel Neuer den gol di e seleccion Aleman, prome cu esaki bira oficial, a genera bastante polemica den e ambiente di futbol Germano. Algun ex-hungado internacional a mustra nan mes na fabor di e decision aki, manera ta caso di Matthias Sammer, mientras cu otronan, manera Oliver Kahn, a critica e idea fuertemente.
E miho mester hunga
Sammer a declara den un podcast cu e periodista Riccardo Basile cu e meta principal mester ta pa hiba e miho portero p’e Mundial. Segun Sammer, n’e momentonan aki e miho keeper Aleman ta sigui ta Manuel Neuer, y no mester tene ningun consideracion cu Oliver Baumann, a pesar cu esaki a hunga practicamente henter e fase di clasificacion.
“Pa nada,” Sammer a responde ora a wordo cuestiona si e tin compasion cu e situacion di Baumann. “Deporte di rendimento halto no ta algo dushi so. Ta paga nan hopi bon. E miho mester hunga. Y si tin otro hungado cu ta tristo, nan por keda cas mes,” el a agrega.
Pa Sammer, e decision na fabor di Neuer ta esun corecto, reafirmando cu e meta mester ta pa bay cu e miho talentonan disponibel.
Dudanan riba condicion fisico y credibilidad
Di otro banda, Oliver Kahn a duna un opinion completamente diferente den e programa Doppelpass. El a señala cu un return di Neuer pa kita Baumann for di su puesto lo afecta henter e ekipo y lo pone den duda e credibilidad di e seleccionador Julian Nagelsmann, kende lo anuncia e lista di hungador pa e Mundial e diahuebs aki.
Kahn a splica cu na final di su mesun careda el a duna cuenta cu e curpa tin mester di mas tempo pa recupera. Den e ultimo hungado di Bundesliga, Neuer a sufri molester na su batata di pia y mester a wordo substitui, locual a habri duda si e por ta presente diasabra den e final di e Copa di Alemania, unda Bayern lo enfrenta Stuttgart.
“Puntualmente ta posibel, pero ta dificil duna rendimento maximo dia aden dia afo. E curpa ta mas fragil y tin mester di mas tempo pa recupera. Hunga un Mundial na un nivel asina halto lo ta un reto enorme pa Manuel,” Kahn a splica. Neuer actualmente tin 40 aña di edad y den su momento a renuncia na e seleccion pa concentra unicamente riba Bayern.
Critica riba e fecha di e anuncio
Segun informacion di e canal di pago Sky y di e diario Bild, Nagelsmann a informa Baumann caba riba su decision di convoca Neuer. Baumann, di 35 aña, lo a acepta pa bay e Mundial como portero suplente.
Sinembargo, e hecho cu Nagelsmann lo anuncia e lista e diahuebs aki tambe a ricibi critica, specialmente di e ex-capitannan Lothar Matthäus y Philipp Lahm. Ambos ta considera cu no ta apropia pa publica e lista dos dia prome cu e final di e Copa di Alemania entre Stuttgart y Bayern.
Matthäus a cuestiona e decision aki den un combersacion cu Lahm publica pa e revista Sportbild:
“Con ta posibel anuncia e hungadornan dos dia prome, sabiendo cu tin dos of tres hungado cu lo ta riba campo, cu tin e ilusion di hunga un Mundial y cu por sufri un desilusion asina grandi?”
Lahm a bay di acuerdo cu ne, indicando cu si un hungado keda desapunta p’e lista, esaki por afecta su rendimento directamente den e final di diasabra. Un di e hungadonan cu por wordo afecta mas t’e portero di Stuttgart, Alexander Nübel, kende tabata e suplente habitual di Baumann. E yegada di Neuer lo por move Nübel como di tres portero of inclusive laga structuralmente pafo di e seleccion.
