Fraccion di MEP ta continua cu reunionnan cu gremionan pa duna update tocante e ley di reino HOFA.
“Pa mi ta hopi importante pa tur hende tin e informacion mas recien di e ley di reino, pa asina cada persona y gremio mes por husga pa nan mes. Den e caso aki nos ta reuniendo cu gremionan pa duna un update di e cambionan den ley y informacion cu nos a ricibi di gobierno”, segun lider di fraccion di MEP.
Cambionan den e ley
Pa loke ta e ley mes, a nota cu gobierno di Aruba a haci algun cambio menor den e ley prome cu a entrega esaki na Raad van State y Raad van Advies, sin a duna ningun clase di informacion. Despues cu Fraccion di MEP a reclama gobierno di Hulanda cu nos gobierno no ta duna informacion, e minister di finansas a manda e textonan nobo di e ley pa Parlamento. Por a nota e cambionan menor cu a wordo haci, y cu na opinion di fraccion di MEP, ainda no ta suficiente pa kita e preocupacionnan cu ta biba den comunidad.
Cuanto ta spaar na interes
Tambe e fraccion den e reunionnan informativo ta comparti e sumanan cu ta spaar si bay di acuerdo cu e rijkswet, basa riba un presentacion di e Minister di Finansas recientemente. Locual a hala atencion ta cu e Minister di Finansas a declara cu ta apenas awor e calculacionnan a wordo haci. Kiermen nan a bay di acuerdo cu e ley desde augustus 2025, sin cu e calculacionnan tabata conoci! Ta trata di 8 miyon florin pa aña riba e debe di Covid, pa 17 aña ainda. Y 21 miyon florin pa aña riba e debe cu tabata existi prome cu COVID, pa un periodo di 11 aña. Pues nada compara cu 800 miyon cu recientemente minister encarga cu Asuntonan di Reino Gerlien Croes a publica.
E pregunta ta cu si pa e suma aki ta bale la pena entrega nos autonomia. Pa pone den contexto real: pa 2025 gobierno anterior a laga 18 miyon florin atras pa drecha careteranan, e gobierno nobo aki a laga e placa bay perdi! Loke ta spaar na interes, compara cu esaki, sigur no ta hustifica pa entrega nos autonomia.
Conseho negativo di Raad van Advies
Mientras tanto Raad van Advies di Aruba a duna su conseho cu e ley di reino ta contra nos Constitucion. Esey kiermen cu si di berdad gobierno kier sigui cu e ley di Reino, mester bin cu cambionan fundamental. Locual ta mas di lamenta ta cu te dia di awe no tabata tin debate serio den Parlamento di e tema aki. Fraccion di MEP ta sostene e pensamento di sindicatonan cu Parlamento mester reuni mas pronto posibel y fiha un posicion. Fraccion di MEP ta gradici gremionan cu ta sigui mustra interes den e tema importante aki.
