Diahuebs ultimo, representantenan di FIFA, entre otro Jordan Victoire (Regional Office Project Coordinator), tabata na Aruba pa asina oficialmente duna inicio na e proyecto di shete (7) veld cu lo haya yerbe artificial.
FIFA ta reserva fondo pa su miembronan despues di cada mundial. Desde 2016, FIFA a lansa e ‘FIFA Forward 1.0 Program’, cual despues a bira 2.0, y desde aña 2023 a lansa e ‘FIFA Forward 3.0 Program’. Pa medio di e programa aki, FIFA ta yuda su 211 miembronan rond mundo cu fondonan considerabel pa desaroya futbol den tur skina. Desde 2016 en adelante, FIFA a inverti 2.8 biyon dollar den, entre otro, infrastructura pa yuda su miembronan. Aruba tambe, via di AVB, ta bin na remarke pa ricibi dicho fondonan pa asina eleva infrastructura di nos clubnan y, desde eynan, desaroya nos atletanan pa un otro nivel. Pero pa Aruba por a haci uzo di e fondonan aki, mester a cumpli cu dos condicion cu FIFA a pone riba mesa.
Condicionnan di FIFA prome cu inverti den (7) veld:
Na aña 2021, a reuni cu Jordan Victoire di FIFA hunto cu AVB, pa asina yuda coordina e necesidadnan pa logra yega na e fondonan di FIFA. Esaki tabata pa shete (7) veld na Aruba por haya yerbe artificial, cubri cu e fondonan di FIFA.
Condicion number (1) di FIFA:
Ta cu e pais mester percura pa tin un stadion nacional cu yerbe y luznan acredita segun exigencianan di FIFA, pa asina FIFA por los e fondonan pa proyectonan local. Desde 2016 Aruba no tabata tin un stadion acredita, y nos seleccionnan mester a hunga ‘home games’ den exterior, manera na Corsou y Tampa. Gabinete Wever-Croes II a percura mesora pa renoba GPT Stadion Dakota. Durante e proceso, FIFA a manda su expertonan bin haci site inspection y, finalmente, e compania independiente Sports Labs a bin certifica e yerbe artificial, cual awor ta riba e lista di acreditacion di FIFA. Alabes, e luznan cu tabata apenas 300 Lux a wordo renoba pa LED lights cu awor ta cumpli cu e standard di 1200 Lux. A renoba e kleedkamernan, un tribuna cu tabata afgekeurd y e VIP area. Asina Aruba a cumpli cu e prome condicion desde e di dos mitar di aña 2024. Banda di esaki, Gobierno hunto cu Lotto pa Deporte a renoba e pista di atletismo tambe por completo.
Condicion number (2) di FIFA:
Tur e terenonan di e clubnan cu ta bay haya yerbe artificial mester wordo traspasa pa un minimo di 30 aña pa dicho club. Inicialmente, cinco (5) club lo a bin na remarke, pero door di insistencia di Gobierno e tempo aya, a logra aumenta esaki pa shete (7) club. Ta trata di: Nacional, Bubali, RCA, River Plate, Dakota, Estrella y La Fama. Cinco (5) di e clubnan aki tin nan tereno como huurgrond y mester a cana un proceso via di un Landsbesluit pa logra esaki, mientras cu dos (2) club tin nan tereno regla como erfpacht, cual mester a wordo canalisa via departamentonan y notario.
All by all, Gabinete Wever-Croes II a logra cumpli den e di dos mitar di 2024 cu e condicionnan pa asina FIFA continua cu e proceso hunto cu AVB. Parti di e proceso a encera cu AVB mester a sera un contrato cu cada club pa despues inicia e proceso di aanbesteding. Preparacion pa e aanbesteding a continua durante aña 2025 y finalmente awor nos ta asina leu.
Pues, tabata tin mester di hopi preparacion y coordinacion di trabou pa por logra pone un proyecto di e magnitud aki riba pia. Gabinete Wever-Croes II a cumpli cu e dos (2) condicionnan di FIFA, cual tabata di vital importancia pa e magno proyecto aki.
FIFA hunto cu AVB y Gobierno a efectua e groundbreaking:
Den e overdrachtsformulier (cual awe nos lo publica), e minister di e tempo ey na maart 2025, Dangui Oduber, a traspasa e documento aki pa e minister cu a drenta, esta Gerlien Croes. A pone hopi accento riba e importancia di e desaroyo avansa aki di FIFA, pidiendo e minister tur cooperacion den e fase final.
Nos por ta contento cu diahuebs ultimo por a tuma nota di Jordan Victoire y mas representante di FIFA na Aruba unda hunto cu AVP, Club Nacional , gobierno y invitadonan a hasi e groundbreaking di e prome di (7) veldnan cu lo hanja yerbe arificial (turf) durente anja 2026 y 2027. Pabien AVB, pabien Nacional (como e prome), pabien na tur (7) clubnan, pabien na tur nos atletanan na Aruba y danki FIFA pa kere den Aruba. Palabra di gratitud na tur instancia, departamentonan di gobierno cu a brinda nan contribucion den e proceso pa logra esaki.
Nos por ta contento cu diahuebs ultimo por a tuma nota di Jordan Victoire y mas representante di FIFA na Aruba, unda hunto cu AVB, Club Nacional, Gobierno y invitadonan, a haci e groundbreaking di e prome di e shete (7) veldnan cu lo haya yerbe artificial (turf) durante aña 2026 y 2027.
Pabien AVB, pabien Nacional (como e prome), pabien na tur shete (7) clubnan, pabien na tur nos atletanan na Aruba y danki FIFA pa kere den Aruba. Un palabra di gratitud na tur instancia y departamentonan di Gobierno cu a brinda nan contribucion den e proceso pa logra esaki.
