Diamars mainta, Minister Geoffrey Wever, Minister encarga cu asunto nan Economico, Finanzas y Sector Primario den nomber di Gobierno di Aruba, a anuncia e introduccion oficial di un carnet pa productornan local c uta comercialmente activo den nos Sector Primario. Un paso importante den e esfuersonan continuo pa fortalece agricultura local den un forma mas eficiente, stimulando asina produccion nacional y promoviendo sostenibilidad alimentario na Aruba.
E carnet nobo aki lo sirbi como un reconocemento oficial di productor commercial y lo facilita e identificacion entre agricultor, criadornan, piscador, y apicultor como nos emprendedornan den e Sector Primario. Cu e carnet, productornan local lo por beneficia di e incentivo fiscal sin mester cada biaha hasi un petición pa carta di Santa Rosa. Esaki lo conduci den menos burocracia y mas eficiencia. Esaki ta simplifica e proceso y asegura cu e proceso di importacion di productonan liber di impuesto ta bay di un manera mas lihe. Tene na cuenta si, cu e mester ta producto y/of materialnan cu ta pa specíficamente pa Sector Primario, di acuerdo cu e ley di Douane, kende nan ta responsable tambe pa hasi e control di e diferente producto nan importa.
Na e ocacion aki Minister. Sr. Geoffrey Wever a hiba palabra y ta sumamente satisfecho cu e trabou cu a wordo hasi entre e Departamento di Agricultura, Cria y Pesca-Santa Rosa pa medio di sra. Nathalie Maduro conhuntamente cu Departamento di Aduana Aruba cu e cooperación di Sr. mr. Roderick Croes.
Sra. Nathalie Maduro a splica un poco di e procedura, caminda cu cada productor mester ta inscirbi na Santa Rosa. Kico esaki ta rekeri, pa trece tur informacion preto riba blanco manera entre otro, papel di tereno, ID valido, un situatie plan di e tereno y un registro di Camara di Comercio valido y asina yega na remarke pa por haya e carnet.
Di parti di Departamento di Aduana Aruba Sr. mr. Roderick Croes pa splika e proceso di pone tur informacion di e productor local den e sistema digital “Asecuda” pa asina por yega na remarke pa impuesto liber ariba e diferente producto of material pa nan producción. Esaki sigur lo hasi e trayecto mas fasil y eficiente.
Despues di introduccion y aplicación a hasi entrega di e prome carnet na sr. Kendrick Balentin di “Keda Botanicals” pa medio di Minister sr. Geoffrey Wever. Riba e carnet ta aparece potret nomber di e productor y su compania. Sigui pa un number di oficial di registro y cu un codico cual ta señala den cual di e 4 sector nan e ta activo.
Palabra di gratitud y felicitacion sr. Kendrick Balentin como e prome productor local cu ta ricibi e carnet cu e number LB 001/2026. Tambe na Minister sr. Geoffrey Wever, sra. Nathalie Maduro di DLVV-Santa Rosa y Sr. mr. Roderick Croes di Departamento di Aduna Aruba pa e bon cooperacion ricibi pa por a logra esaki pa tur nos productor nan comercial cu ta forma parti di nos Sector Primario di Aruba.
