FIFA a confirma dialuna cu e seleccionnan di Colombia, Iran, South Corea, Sur Africa, Uruguay, Tunez y Mexico lo tin nan campamento base den e pais aki p’e Mundial 2026 cu lo cuminsa dia 11 di juni proximo.
E ekipo di Sur Africa, cu lo enfrenta e conhunto local den e inauguracion na Estadio Azteca, lo concentra na Pachuca, Hidalgo, situa un 90 kilometer nort di e capital Mexicano. Den e Mundial, Sur Africa lo forma parti di grupo A hunto cu Mexico, South Corea y Republica Checa.
South Corea lo tin su concentracion na Guadalajara, Jalisco, den west di e pais, den e instalacionnan di Chivas di Guadalajara, un di e ekiponan mas popular di e liga local. Di su banda, Mexico, dirigi pa Javier Aguirre, lo tin su cuartel general den e Centro di Alto Rendimiento di e Federacion Mexicano di Futbol, situa zuid di Ciudad de Mexico, cerca di Estadio Azteca.
Iran, integrante di grupo G hunto cu Belgica, Egipto y New Zealand, lo tin su concentracion na Tijuana, Baja California, den nort di Mexico, den e instalacionnan di Xolos di Tijuana, a pesar cu nan no lo hunga ningun partido den e pais aki. Esaki a wordo confirma pa Claudia Sheinbaum, presidenta di e pais. E mandatario a splica dialuna cu Merca no tabata kier pa e seleccion di Iran pasa hamber ni keda drumi eyran, pa cual motibo Mexico a acepta pa ricibi nan sin ningun problema.
E seleccion di Colombia, cu ta den grupo K hunto cu Portugal, Republica Democratico di Congo y Uzbekistan, lo traha na Guadalajara den e instalacionnan di Atlas. Colombia lo debuta dia 17 di juni contra Uzbekistan den Estadio Azteca, lo hunga dia 23 contra RD di Congo na Guadalajara y lo cera e fase di grupo contra Portugal dia 27 na Miami.
Uruguay, situa den grupo H cu Spaña, Cabo Verde y Saudi Arabia, lo concentra na Cancun, Quintana Roo, den e Mayakoba Training Center. E ekipo di Marcelo Bielsa lo hunga un partido so na Mexico, dia 26 di juni contra Spaña. Por ultimo, Tunez, cu ta comparti grupo F cu Hulanda, Hapon y Suecia, lo keda na Monterrey, Nuevo Leon, den nort di e pais.
