Ora hende tuma pa custumber pa apoya pica, maldad, y inmoralidad, e ta algo peligroso den bista di Dios.( Romanonan 2:5).
Awendia a bira normal ora dos hoben sea homber of muher ta bringa cu otro, tin hende para den banda ta filma pa pone riba facebook, y tin biaha ta hende grandi cu mester para e asunto of yama polis.
Ta normal ora un polis para un hende cu auto of cu brommer e persona sigi corre y trata di huy pa polis, pero e polis si mester comporte netji sin aplica ley y laga e show tuma lugar.
Hende ta den adulterio ta fiesta, bebe, baila y ta graba pone riba facebook y otro media pa asina e rival por mira con nan ta gosa.
Usamento di droga den publico, pa asina e holor por demostra cu nos no tin cunes,ta droga nos ta usa.
Hoy se bebe, a bira tur dia se bebe, y asina alcohol a tuma control di bida y henter famia.
Violencia den famia, pelea den matrimonio,destrui propiedad di otro a cohe un direccion doloroso.
Hopi biaha cu nos tende a perde cos, accidente di auto, y laga auto atras , manera e no ta bal nada, tin maldad su tras.
Abuso di mucha, violacion, a bira algo normal ora un relacion ta bay kibra of a kibra, pa asina haci danjo na yiu di hende pasobra e relacion a termina.
Haci cherche di palabra di Dios, haci malo.biba den pica y abominacion y usa palabra di Dios y bisa “Esun cu no tin pica tira e prome piedra”
Tene cuenta cu ora bo consenti cu pica ta mescos cu ta bo mes a hacie.
Ora David a manda traha un trampa pa Urias pa asina e muri ora bataya a cuminsa, Dios a mustre cu e mes ta e criminal.
Ora como mayor nos no ta disiplina nos yuinan, e ora ey Proverbionan 19:18 ta bira realidad, pasobra esun cu ta stima su yiu ta pone disiplina for di chikito.
Ora nos laga cos bay for di man nos ta bira complice, ora nos ta apoya maldad, y inmoralidad, nos ta complice.
Nos ta bibando den un tempo manera Sodoma y Gommora,nos ta un isla chikito cu Dios a spaar for di desasternan natural, pero e hecho cu maldad y inmoralidad a bira entertainment, ta pone cu hopi dolor y sufrimento ta alcansa nos isla.
Mas awor ainda cu tin huramentacion diabolico ta tuma lugar den e famoso Geng di hobennan, caminda tur hende sa pero ningun hende no kier papia pa nan no haci e famoso “Snitch” cu por causa nan bida, of demostra cu nan ta menos homber, y pregunta ta bini awor ta na unda nos ta bay cu e situacion aki?
Ta bon pa den cada cas mayor y yiu lesa y medita den Proverbionan 5:7-14, y wak si no tin cos pa drecha den bida.
Y boso soporta otro y pordona otro, si un di boso tin un keho un contra otro, mescos cu Senjor a pordona boso, boso tambe mester haci.( Colosensenan 3:13).
Hende bobo ta haci bofon di pica,ma e fabor di Dios, ta biba meymey di e rectonan.( Proverbionan 14:9).
No ta pasobra nos ta bibando den tempo trabahoso, nos mester bay di acuerdo cu maldad y inmoralidad, mantene bo mes limpi y puro, sea di bon karakter, mantene bo integridad na halto, biba den Santidad, aleha for di diablura. Biba firme den Senjor.
Esey ta nos tur su deber y e ta bon pa nos, demostra bondad tur momento.
Sinceramente, Pastor Marcel Balootje
