Durante e bishita oficial di delegacion di Aruba na Den Haag, Prome Minister mr. Mike Eman a reuni cu lider di CDA, Henri Bontenbal, den Tweede Kamer der Staten-Generaal. Henri Bontenbal a cataloga e encuentro como un dialogo positivo entre “amigonan cristian-democrata”, unda a intercambia pensamento riba futuro di Reino Hulandes y e oportunidadnan cu cooperacion entre e diferente paisnan por ofrece.
Segun Bontenbal, ta importante pa no solamente mira e relacionnan den Reino for di problema of pasado, pero tambe for di e oportunidadnan pa futuro y e “win-win” cu por crea entre e diferente paisnan den Reino. Durante e reunion, a dialoga riba varios proyecto concreto, incluyendo e acuerdo reciente tocante cooperacion cu Wageningen University & Research (WUR), e relacion strategico cu KLM y con pa sigui fortalece conexionnan entre Aruba y Hulanda. Segun Bontenbal, e encuentro a duna idea y inspiracion pa continua e dialogo den Parlamento Hulandes riba e temanan importante pa Aruba y Reino.
Ora a puntra Bontenbal e pregunta si ta dificil pa mantene apoyo pa Aruba den Tweede Kamer, Bontenbal a indica cu tin diferente partido politico cu ta kere den importancia di un Reino fuerte y den mantene e relacionnan positivo cu Aruba y e otro paisnan den Reino. El a enfatisa cu CDA ta keda comprometi n’e relacion aki y cu e partido kier continua fortalece esey.
Gobierno di Aruba ta aprecia e dialogo constructivo cu diferente actor politico den Hulanda y ta continua traha pa fortifica e relacionnan basa riba respeto mutuo, cooperacion y balor agrega pa tur pais den Reino Hulandes.
