Cu e inauguracion oficial di e Zona di Desperdicio nobo EcoTech na Barcadera, a duna un paso importante den e vision pa modernisa y fortalece e maneho di desperdicio na Aruba. Durante e actividad, a comparti informacion tocante e funcionamento di e facilidad, e progreso di e campaña Aruba Limpi y e direccion cu Aruba ta sigui pa mehora e sistema di piki sushi como tambe e separacion y procesamento di esaki. E iniciativa ta forma parti di un esfuerso nacional pa proteccion di nos medio ambiente.
Pa ilustra e programa Baki den Bario a cera aña 2025 cu resultado record, registrando mas di 800 ton di sushi durante 10 edicion organisa den diferente bario. Durante e campaña, mas cu 4.000 vehiculo a haci uso di e iniciativa y a yena mas cu 500 baki di sushi. Entre e materialnan recogi tabatin 696 ton di sushi mixto, 70.5 ton di foyo, 14 baki of si pone den peso; 20 ton di di taira recolecta. E cifranan aki ta confirma cu tin un gran necesidad den Aruba pa bin cu facilidad cu ta permiti nos pueblo deshaci di sushi na un manera adecua. Awor e inauguracion di e zona aki, Aruba ta reafirma su compromiso cu un futuro mas limpi y sostenibel. Prome Minister Mike Eman a califica e proyecto como un paso importante den e esfuerso pa mehora calidad di bida den nos comunidad y fortalece e compromiso nacional pa un Aruba mas limpi. Zona di Desperdicio no ta un luho, sino un servicio esencial cu gobierno mester ofrece na su pueblo. Mirando pa futuro, unda gobierno tin e ambicion pa amplia e concepto cu varios facilidad similar rond di Aruba, permitiendo cu mas bario por beneficia di e servicio. Esaki pues t’e prome paso den un esfuerso mas amplio.
Gobierno di Aruba ta gradici Aruba Tourism Authority y EcoTech pa nan contribucion den realisa e proyecto y a destaca cu cooperacion entre gobierno y sector priva por produci resultado concreto pa beneficio di comunidad caminda limpiesa, dignidad y calidad di bida mester ta accesibel pa tur ciudadano. Cu e apertura di e Zona di Desperdicio, mas famia Arubiano awor tin acceso na un servicio cu ta contribui directamente na bienestar di nan entorno y comunidad.
