Fundacion Lanta Papiamento (FLP) ta hopi satisfecho cu e celebracion exitoso di e 23 aniversario di Oficialisacion di nos idioma Papiamento, cu a tuma luga recientemente na Departamento Arubiana-Caribiana di Biblioteca Nacional Aruba (BNA).
E actividad “Papiamento den Hofi” a reuni un publico grandi y entusiasta, creando un ambiente special di union, orguyo cultural y amor pa nos idioma materno.
Durante e anochi unico aki, e participantenan a disfruta di un programa varia cu a pone enfasis riba e balor y rikeza di Papiamento.
Como parti di e celebracion, FLP a organisa un rifa special. Dialuna, via su plataformanan social, FLP a anuncia e number ganador di e rifa. E ticket premia ta e number #403020.
FLP ta invita e persona cu tin e ticket ganador pa manda un mensahe priva (DM) via e pagina di Facebook di Fundacion Lanta Papiamento (@flparuba), pa coordina e entrega di su premio: e buki Ata Compa Nanzi Atrobe!.
Fundacion Lanta Papiamento ta expresa su sincero agradecimento na tur esnan cu a asisti na e evento y cu ta sigui sostene y promove nos dushi idioma Papiamento.
Hunto ta sigui traha pa fortalece y preserva nos idioma pa generacionnan presente y futuro. Ban promove nos idioma!
