Aruba Tourism Authority (A.T.A.) ta expresa cu orguyo su sosten na seleccion nacional di futbol di Aruba, cu lo representa nos pais den e partido FIFA contra Curaçao riba diasabra, 6 di juni 2026, na estadio Ergilio Hato na Curaçao. Pa A.T.A., e sosten aki ta mas cu un colaboracion institucional; e ta un declaracion cla di apoyo na nos atletanan, nos identidad y nos orguyo como pais. A traves di e apoyo aki, A.T.A. ta contribui na aspectonan practico manera biahe, logistica y uniformnan, pa haci posibel e participacion di e seleccion nacional.
Deporte, y specialmente futbol, ta forma parti integral di nos sociedad y comunidad na Aruba. E seleccion nacional no solamente ta representa talento deportivo, pero tambe perseverancia y disciplina. Pa A.T.A., para tras di nos ekipo nacional ta un manera natural pa sostene tur esnan cu ta pone Aruba riba mapa, no solamente como destino turistico, pero como pais cu caracter y pasion. Sosteniendo nos seleccion nacional, A.T.A. ta reconoce e rol importante cu nos atletanan ta hunga como embahadornan di Aruba. Nan ta carga e bandera, e cultura y e nomber di nos isla cu nan den cada partido, y nan logro ta comparti y celebra pa henter comunidad, sirbiendo tambe como inspiracion pa futuro generacionnan.
E encuentro entre Aruba y Curaçao ta wordo considera un evento deportivo di profiel halto, conoci tambe como un “Kingdom Derby”. E partido aki ta atrae atencion significativo di publico y medionan di comunicacion, specialmente pa motibo cu e ta e ultimo partido di Curaçao prome cu nan participacion den Copa Mundial 2026 di FIFA. Esaki ta crea un escenario ideal pa Aruba wordo presenta den un contexto deportivo internacional cu gran alcance.
Ademas, A.T.A. ta mira e sosten aki como un manera pa fortalece e conexion entre destino, cultura y comunidad. Deporte ta uni hende, ta crea emocion y ta fortalece sentido di pertenencia, y esaki ta balornan cu ta profundamente conecta cu e esencia di Aruba.
A.T.A. ta desea e seleccion nacional di futbol di Aruba hopi exito den e partido di awe, 6 di juni.
Mas cu claro, A.T.A. tambe ta desea e seleccion nacional di Curaçao tur clase di exito den Copa Mundial 2026.
