Presidente di Comision di Asuntonan di Reino y Relacionnan Exterior y lider di fraccion di AVP, Jennifer Arends-Reyes, a participa recientemente den diferente reunion fructifero den cuadro di e Reunion Tripartite, hunto cu delegacionnan parlamentario di Corsou y Sint Maarten, un dia prome cu e reunionnan oficial di Interparlementair Koninkrijksoverleg (IPKO) na Hulanda.
Segun Arends-Reyes, e encuentro aki a brinda un oportunidad valioso pa intercambia punto di bista, comparti experiencia y fortalece e cooperacion parlamentario entre e paisnan Caribense cu ta forma parti di Reino Hulandes. Durante e reunionnan, a aborda diferente tema di interes comun, incluyendo e relacionnan den Reino, e trayecto pa implementacion di un Geschillenregeling y e rol y experiencia di banco central y union monetario den e diferente paisnan.
Un tema cu a ocupa atencion special durante e reunionnan tabata e reciente voto den Nacionnan Uni tocante e propuesta pa reconoce sclavitud y trata humano transatlantico como un di e crimennan mas grave contra humanidad. Segun Arends-Reyes, e delegacionnan di Aruba, Corsou y Sint Maarten a yega na un posicion comun tocante e abstencion di Reino Hulandes durante e votacion.
“Nos ta considera cu mester a discuti e topico aki previamente cu e paisnan Caribense den Reino. E historia di sclavitud y trata humano tin un significado profundo pa nos pueblonan y, p’esey, ta importante cu nos bos tambe wordo tende y considera den decisionnan di e caliber aki,” Arends-Reyes a expresa.
E delegacion di Aruba a enfatisa durante e reunionnan cu Aruba, Corsou y Sint Maarten tin hopi realidadnan, desafio y interesnan comun. P’esey, ta esencial pa sigui uni forza y fortalece e colaboracion entre parlamentario nan pa asina defende interesnan comparti y crea un voz mas fuerte den discusionnan cu tin impacto riba futuro, autonomia y bienestar di e ciudadanonan di e tres paisnan.
Arends-Reyes a indica cu e Reunion Tripartite ta mucho mas cu un encuentro formal. Segun dj’e, e ta un plataforma importante pa construi confianza mutuo, profundisa dialogo politico y identifica area concreto di cooperacion. Door di comparti experiencia y bon practica, e paisnan por siña for di otro y apoya otro den proceso di modernisacion, fortalecemento institucional y desaroyo sostenibel.
“Nos a confirma un biaha mas cu contacto directo entre parlamentario nan di Aruba, Corsou y Sint Maarten ta esencial. Aunke cada pais tin su propio identidad, autonomia y realidad, tin suficiente interesnan comun pa sigui traha cu un vision comparti den beneficio di nos pueblonan,” Arends-Reyes a declara.
E delegacion di Aruba ta mira bek riba e reunionnan como altamente positivo y productivo y ta reafirma su compromiso pa continua participa activamente den e proceso di cooperacion tripartite.
“Nos lo sigui contribui activamente na fortalecemento di e relacionnan dentro di Reino, promoviendo comprondemento mutuo y buscando solucionnan concreto pa e retonan cu nos paisnan ta enfrenta. Solamente door di cooperacion, respet y dialogo constructivo nos por construi un futuro mas stabiel, mas husto y mas prospero pa nos comunidadnan,” Arends-Reyes a conclui.
