Minister di Finansa, Asunto Economico y Sector Primario, mr. Geoffrey Wever, ta considera FinTech como un sector strategicamente primordial pa diversificacion economico, innovacion y crecemento di Aruba. Minister Wever su vision ta pa posiciona Aruba pa bira un centro financiero digital regional, haciendo usodi su sector bancario robusto pa crea oportunidadnan di empleo nobo di nivel halto y mitiga riesgonan manera “brain drain”. E meta ta pa modernisa e sector financiero y pa ofrece servicionan mas eficiente, accesibel y facil pa usa pa henter e comunidad.
Pa por transforma e vision aki den un Plan di Implementacion di FinTech concreto, Minister Wever a encarga un studio exploratorio extenso door di e Comision Economico di Nacionnan Uni pa America Latino y Caribe (UN-ECLAC) na 2025. E investigacion a inclui misionnan di alto nivel pa acumula informacion y consultacionnan extenso cu stakeholdernan, marcando e ambiente regulatorio actual di Aruba y identificando oportunidadnan y riesgonan specifico. E estudio a compara e infrastructura di Aruba cu benchmarknan internacional, incluyendo paisnan di OECD y Small Island Developing States (SIDS), dunando un bista cla di e areanan cu mester mehora pa por crea un ecosistema di FinTech dinamico y robusto.
E resultadonan di e studio di UN-ECLAC ta sirbi como e base pa desaroya e Plan di Implementacion di FinTech. E desaroyo di e plan di implementacion di FinTech ta parti tambe di ecolaboracion estrecho cu Hulanda via e Landspakket Aruba. Hulanda via e Landspakket Aruba lo financia e desaroyo di e Plan di Implementacion di FinTech. Actualmente tin un proceso di destaho publico andando.
Paralelo na e esfuersonan legislativo, Banco Central di Aruba (CBA) ta hungando un rol crucial den preparacion di e mercado local door di organiza e Foro di Pago Nacional (FPN) cu e tema FinTech. Estableci como un plataforma permanente di consulta, e FPN ta reuni stakeholdernan publico y priva — for di companianan di utilidad te cu e sector bancario — pa sigura cu e panorama di pago di Aruba ta sigur, confiabel y accesibel. Minister Wever a accentua cu promove inclusion financiero no ta solamente un meta social, sino un necesidad economico vital. Door di mehora comportamento financiero y preveni debe excesivo, e iniciativanan aki ta fortalece e poder di compra di e comunidad y e salud financiero general di e nacion.
FinTech ta sirbi como un via pa relevancia global y diversificacion economico. teniendo cuenta cu recomendacionnan di UN-ECLAC, incluyendo e creaccion di un sandbox regulatorio, Aruba ta creando e infrastructura necesario pa sectornan nobo impulsa pa tecnologia. Esaki ta resulta directamente den oportunidadnan di trabou nobo di nivel halto pa e forsa laboral local, reduci dependencia riba un solo sector economico y construi un base firme pa futuro.
Mientras cu digitalisacion ta acelera, e CBA ta tuma un postura proactivo pa educa y dialoga cu partnernan di sector publico y sector priva pa cuminsa encamina e proceso pa implementacion di e tecnologia. Trahando hunto ta e unico maner pa logra haci e vision bira realidad.
Durante e ultimo Foro di Pago Nacional (FPN), organisa door di Banco Central di Aruba (CBA), cu a tuma luga dia 4 di juni 2026, e topico di e sesion di e Working Group meeting tabata “FinTechs na Aruba.” E sesion a inclui un discussion di panel cu panelistanan representando Sentoo, CxPay y Pay.aw, kendenan a elabora riba e rol di FinTechs den e ecosistema di pago di Aruba. Ademas, CBA a brinda dos presentacion, titula “Kiko ta FinTech?” y “Ambiente Regulatorio di FinTech.” Adicionalmente, un representante di e Departamento di Asuntonan Economico, Comercio y Industria di Aruba a duna un presentacion titula “Landspakket – Plan di Implementacion di FinTech.” E mainta a conclui cu un discussion den grupo caminda e riesgonan, desafionan y recomendacionnan pa e crecemento di e sector FinTech a wordo discuti cu tur stakeholdernan di e FPN.
“Door di e colaboracion continuo di e Working Group di FPN, Aruba ta riba bon caminda pa logra un infrastructura di pago di nivel internacional,” Minisyter Wever a comenta.
Minister Geoffrey Wever ta gradici banco Central di Aruba pa organisa e Foro di Pago Nacional Working Group session.
