E homber Zuriel Celaire (22), a presenta dilanti Hues pa e caso penal cu Ministerio Publico a cuminsa contra dje. E ta wordo acusa di menaza di morto y posecion di armanan di candela.
SOLO DI PUEBLO por a compronde cu Zuriel, na 2020, Hues a conden’e pa a forma parti di asalto arma cu violencia, pa a tira riba 4 hende dilanti di American Bar y pa tabata envolvi den e asesinato di Sharury. E mester a haya tratamento obligatorio na Hulanda y a bolbe Aruba na 2025.
ACUSACIONNAN SERIO
E acusacionnan cu Fiscal a presenta den Corte contra Zuriel ta: intento di maltrato, menaza cu morto y posecion di arma di candela den e periodo di 9 April 2025 y 27 September 2025.
Tambe e ta wordo acusa cu entre 9-10 April 2025 a choca e homber D. Lesire y dal cu arma na cabez. E mesun dia a menaza homber D. Lesire cu arma. Tambe a menaza un otro persona cu arma. Tambe cu riba 27 September 2025, el a menaza e ruman muher di Lesire via whatsapp y tambe e dama Angela.
MALTRATO Y MENAZA CU ARMA
Den sala di Corte tabata presente e mama Lesire y su yiu muher y un otro familiar. Hues a mustra cu segun e relato di Polis, dia 18 September 2025, Zuriel a bay Polis bisa cu nan a tira riba dje. Algun dia despues, Zuriel a bisa Polis cu el a haya sa cu ta e rumannan L. y D. Lesire a haci’e. Zuriel tambe a bisa Polis cu e tin record di a tira hende. Zuriel a bisa Hues cu tempo cu e tabata sera pa e casonan anterior, tabatin grupo den KIA cu el a haci daño, a cera cabez contra dje. Despues el a bay Hulanda. Algun luna despues cu el a bolbe na Februari – Maart 2025 Aruba, el a haya problema. El a bisa cu e tabata wordo persigui pa hendenan cu e no conoce. Na September 2025 el a wordo persigui pa T. Lesire. Hues a bisa cu e rumannan Lesire a wordo deteni y den Corte nan a puntra pakico nan ta wordo castiga y Zuriel no. E rumannan Lesire a wordo condena na 6 aña di prison pa a tira riba Zuriel.
ZURIEL TA NENGA
Hues a bisa cu D. Lesire a bisa Polis cu Zuriel a mand’e un voice note cu e tin marihuana di calidad y pa nan topa banda di EPB San Nicolas. Na e lugar D. Lesire a bay den e auto caminda Zuriel tabata y un hende sinta patras den e auto, a maltrat’e cu un pistol y menace. E hende tabata dal’e cu e pistol na su cabez cada vez y Zuriel tabata bis’e, esaki ta pa bo ruman. Despues D.Lesire logra core bay. D.Lesire a bisa Polis cu un tal Zulu tambe tabata eynan. Segun Zuriel, tur esaki tabata un plan di nan contra dje. El a bisa cu e no tin ningun motibo pa haci algo asina. El a bisa Hues cu for ora el a bin for di Hulanda, e ta siguiendo guia di Reclasering. El a bisa Hues, e no a haci e hendenan aki nada. El a bisa cu e no conoce Zulu. Hues a mustra cu Zulu tambe a wordo interoga. Zulu a declara na Polis cu e tabata serca D.Lesire, kende a bis’e cu e mester topa cu Zuriel na EPB. Nan a bay hunto den un Hyundai blanco. D. Lesire a baha bay den un otro auto. Despues D.Lesire a grita Zulu pero e no a sali. Zulu a bisa cu un homber cu mascara a sali for di e auto cu un pistool y dirigi esaki riba Zulu. Zulu a core bay. Despues D.Lesire a subi auto y core bay. Zulu a declara cu el a bay cas di D.Lesire y mira cu D.Lesire tabatin sla di pistool na cabez y cara. Hues a remarca na Zuriel, cu e no ta haya cu esaki ta un plan contra Zuriel.
Segun e relato di Polis, dos siman despues, e rumannan Lesire a para banda di e auto di Zuriel y Zuriel a bisa nan cu e no tin problema cu nan. Hues a mustra cu Zuriel a manda un voice note caminda e ta menaza e dama Lesire cu arma. Polis a puntr’e si e ta reconoce e stem. Segun Zuriel, e conoce e stem cu ta di un hende di caya pero e no por sigura esey. El a bisa Hues cu e no kier tin problema. Hues a remarca cu si Zuriel a bisa e nomber di e homber, Polis lo por a haci investigacion. Awor ta Zuriel ta den problema. Segun Zuriel, e no ta e persona cu e manda e voice note.
POSECION DI ARMANAN DI CANDELA
Zuriel a bisa Hues cu e grupo aki tabatin intensionnan malo contra dje. El a bisa cu e sa esey pasobra antes e tabata asina. Hues a bisa cu Polis a detene Zuriel y den e cellular a mira Zuriel cu armanan un AK15, un metrayador, y un pistool. Segun Zuriel el a bay riba Google y a mira e armanan y a copia nan. El a bisa Hues cu ta e mes a traha e potretnan cu e tin arma via un programa. Hues a mustra e potretnan den Corte na Zuriel, caminda ta mira Zuriel ta tene arma den man. Zuriel a pone e potretnan den su status. Segun Zuriel, el a haci asina pa laga esnan cu ta busca problema cun’e, mira cu e tin arma. Hues a bisa cu expertonan di arma a bisa cu e potretnan di arma ta real. Zuriel a bisa Hues cu si e haya un cellular awor aki e lo haci’e y e ta mustra real. Pa loke ta e menazanan, Zuriel a bisa cu e no conoce e dama A. y no a manda menaza via cellular.
Segun Zuriel, Lesire ta contento cu e ta sera den KIA. El a bisa cu el a scucha hopi cos. El a bisa Hues cu el a tende cu nan kier mat’e. El a bisa cu den KIA nan sa kico nan ta haciendo.
VICTIMA DI MENAZA A HACI DEMANDA DI DAÑO
E dama Lesire a haci demanda di daño di 7 mil florin. Segun Lesire, e no ta sinti trankil. El a bisa Hues cu e no conoce Zuriel. Zuriel tin problema cu su dos rumannan. E dama a bisa cu e tin miedo di sali y ta hopi traumatisa. Hues a puntra si Lesire ta hayando tratamento. El a bisa Hues cu el a bay dokter di cas pa haya psycologo pero e mes mester paga. E psycologo den sala di Corte a bisa Hues cu cita di psycologo ta entre 250 y 350 florin.
ZURIEL NO KIER PSYCOLOGO HACI INVESTIGACIN
Hues a bisa cu Zuriel tin un carchi di castigo y tabata TBS na Hulanda. Comienso 2025 el a bin bek Aruba. Segun Zuriel, danki na e coordinador na Hulanda, e no a haya e tratamento cu psycologo y psychiater di Aruba a prescribi. El a bisa cu el a haya terapia y sigui cursonan cu a yud’e. E ta haya cu el a siña hopi pa pensa bon y con pa anda cu hende. E ta haya cu na Hulanda nan a yud’e hopi bon. Ariba pregunta di Hues, con ta bay cu e adiccion, Zuriel a bisa cu awor e no ta huma marihuana. Hues a bisa cu awor a bolbe pidi pa raport di psycologo y psychiater pero Zuriel a nenga. Un psycologo cu tabata presente den sala di Corte a splica Hues cu Zuriel a sera pa papia. E psycologo a splica cu Zuriel ta papia si pero no kier papia pa asina psycologo por evalua y suministra informacion na Fiscal. Zuriel a bisa cu e no ta confia e hendenan na Aruba.
ZURIEL MESTER BOLBE BAY HULANDA
E psycologo a bisa Hues, cu e chens ta grandi cu Zuriel ta cay atrobe den e mesun cosnan cu e tabata haci. E empleado di Reclasering a mustra cu Zuriel tabata cumpli pero e ta haya cu mester sigui duna guia. Riba preguntanan di Fiscal por a conclui cu e empleado di Reclasering ta haya cu Zuriel mester sigui guia di psycologo. E psycologo a bisa Fiscal cu por papia hopi cos pero si Zuriel no tin e interes, ta mesun cos. E psycologo a bisa Fiscal cu e ta haya cu Zuriel mester bay TBS atrobe na Hulanda.
POSPONE CASO PA MAS INVESTIGACION
Fiscal a pidi Hues pa pospone e caso pa Fiscal haya mas claridad pa cu e tratamento cu Zuriel mester haya. El a bisa cu e actitud di Zuriel cu e no kier coopera ta trece cune cu no por traha un plan con mester sigui cu Zuriel. E ta haya cu no tin suficiente informacion pa e por haci un exigencia. Fiscal a mustra cu e chens ta grandi cu Zuriel ta cay atrobe den maldad. Fiscal a pidi Reclasering pa haci un investigacion riba ki alternativa lo por tin pa TBS o sea tratamento obligatorio den un institucion.
Abogadonan a papia cu Zuriel y Zuriel a bay di acuerdo pa coopera pa papia cu Reclasering. Hues a pospone e caso pa 28 Augustus 2026. Ta asina cu Zuriel a pidi pa e bay serca su oma y opa. Hues a nenga e peticion. Hues a bisa cu e caso ta hopi serio y no por laga Zuriel liber.
