Despues di e reciente tratamento di presupuesto di Departamento di Obranan Publico (DOW) den Parlamento na mei ultimo, miembro di Parlamento pa AVP, Dennerich Kelly, a reuni e siman aki cu Minister di Infrastructura, Gervais ‘Rene’ Herde, pa sigui duna accion na un mocion presenta door di su persona y posteriormente aproba door di parlamento.
Segun Kelly, e reunion no tabata un simpel encuentro protocolario, sino un paso concreto den e proceso di siguimento, dunament’i cuenta y colaboracion entre parlamento y gobierno.
“Parlamento no ta termina su trabou ora un mocion wordo aproba. Mi ta kere cu hustamente e momento ey ta e punto di salida pa sigui monitor progreso, mantene dialogo y evalua con e accionnan ta wordo implementa,” Kelly a declara.
Durante e reunion cu e minister, Kelly a entrega un documento cu ta contene diferente preocupacion, observacion y señal proveniente directamente di comunidad. E informacion colecta durante contacto cu residente di diferente bario ta enfoca riba asuntonan relaciona cu asfalt, mantenimento di caminda, siguridad vial y maneho di awa.
Entre e diferente localidad menciona den e documento tin Cas di Paloma, Ponton, John G. Emanstraat, Walishali, Sabana Basora, Bubali, Caya Frere Alexius, Macapruimstraat, Tanki Flip, Tamarijn y Piedra Plat.
“E documento no a wordo prepara pa critica, ni pa busca culpabel. Su meta principal ta aporta informacion practico y relevante for di comunidad pa yuda den e proceso di priorisacion di trabounan y inversionnan den infrastructura,” Kelly a splica.
Segun e parlamentario, hopi biaha e problemanan cu residente ta experimenta diariamente no ta cuminza den oficina, sino den bario mes. P’esey e ta considera esencial cu e voz di comunidad yega na e lugarnan unda decisionnan ta wordo tuma.
“Como representante di pueblo, mi ta considera importante pa e experiencia, preocupacion y sugerencia di residente nan forma parti di e proceso di toma di decision. Infrastructura efectivo ta cuminsa cu scucha comunidad.”
Kelly a indica cu e reunion tabata tambe un oportunidad pa haya un actualisacion tocante e mocion presenta anteriormente, den cual el a solicita mas claridad, transparencia y informacion tocante proyectonan di infrastrucura y nan planificacion.
“Mi obhetivo no ta solamente debati, presenta mocion of haci pregunta. Mi obhetivo ta sigui e proceso, mantene contacto cu ministerio y sigura cu e informacion cu pueblo ta pidi ta sigui wordo comparti, analiza y evalua.”
Segun Kelly, bon gobernacion ta depende di comunicacion habri entre gobierno, Parlamento, servicio publico y comunidad. E ta enfatisa cu transparencia y informacion oportuno ta esencial pa fortalece confianza entre ciudadano y gobierno.
“Transparencia ta crea claridad. Claridad ta crea confianza. Y confianza ta mantene pueblo, Parlamento, DOW y gobierno hunto responsabel.”
Kelly a conclui indicando cu e lo continua bishita diferente bario, scucha residentenan, documenta preocupacionnan y sigui contribui na dialogo cu tur actor relevante pa fortalece infrastructura na Aruba.
“Pueblo di Aruba no ta spera perfeccion, pero nan ta spera progreso. Y progreso ta pidi siguimento, cooperacion y accion. Mi lo continua haci mi parti pa e voz di comunidad sigui wordo scucha y converti den resultado concreto.
