Clifford Rosa ta confirma
Stichting Rancho no a tarda pa saca su color politico
Reunion cu Mike Eman ta mescos cu 1 + 1 = 2
Loke tur hende tabata sospecha, a wordo confirma recientemente. E sospecho tabata basa riba e hecho cu diripiente Stichting Rancho a cuminza haci saltonan straño contra loke nan mes a accepta, pa e embeycimento di e area di Wesstraat.
No ta mucho tempo pasa cu Clifford Rosa di Stichting Rancho tabata manso y humilde y a accepta tur e cambionan, na beneficio di waf di Rancho como tambe e projecto nobo cu porcierto ta kedando un joya den centro di Oranjestad.
Diripiente a cambia di actitud. Tabata visto cu politica a cuminza mescla su mes den Stichting Rancho y cu eleccion ta den porta y kier usa tur oportunidad pa spart odio, mentira, haatzaai contra e desaroyo positivo.
Kico nos ta mira awe? Awor Clifford Rosa ta contra di haci un caminda ( cu nunca ta wordo usa) un bunita walkway, combina cu un area di teras, unda hende por sinta canto di awa y gosa di e ambiente.
Dicon Clifford ta asina contra? Dicon e no por accepta cu e lo mantene un caminda pa e yega su waf ? Dicon e ta keda pretende cu te caminda dilanti e edificio e kier? Dicon e kier stroba desaroyo?
Pregunta clave cu Clifford Rosa mester a haci na Mike Eman ayera ta: Ken te politico cu a traiciona piscadornan di Rancho? Cual te partido cu a entrega e tereno aki na 1987? Pa casualidad no por ta partido AVP? di cual e propio Mike Eman ta lider? A reclama Eman?
E actitud di mobilisa Mike Eman pa bay duna show na e sitio, ta nada otro cu propaganda politico cu Stichting Rancho kier haci. Un paso di ultimo recurso pa purba haya atencion paso tur hende sa cu nan ponencianan ta sin base y solamente cu meta pa probechonan personal di 2 – 5 persona. Pasobra dia cu a sinta den reunion pa asina accepta e cambionan, eynan Rosa a bay completamente di acuerdo.
Bo no por ta carni y pisca: Si bo kier embeycimento, bo mester por sa cu e area canto di awa, ta necesario pa wordo comberti den un teras unda por sinta gosa di e ambiente. Dicon bo kier stroba desaroyo? Dicon bo kier pa precies e caminda ey keda existi? Dicon bo no por accepta pa usa un otro caminda, garantisando bo entrada 24 ora pa dia? Ta hopi sitio nos conoce na Aruba unda desaroyo a haci cu a bini varios cambio. Poco mas pariba, a traha un brug pa acomoda un hotel, un desaroyo bunita. Parti dilanti, atrobe a ruim op DOW pa acomoda un tram. Poco mas pabao a ruim op tankinan di awa pa acomoda un plaza turismo. Tur a bini cu cambionan drasitco. Laga nos no papia mes di Caya Principal Betico Croes, unda eynan tambe a cambia tur sorti di trafico, bolter tur caya. Patras di Corte, atrobe Gobierno di Eman a elimina un caminda pa traha un teras pa “Flor de Oriente” den Rancho. Pues, e actitud infantil cu no mag elimina un caminda, ta di unda pensamento aki a sali? Kier hunga wega politico, pa causa instigacion, pa complace ken?
Clifford Rosa y Stichting Rancho mester reflecciona riba nan comportacion y ta momento pa stop di causa obstaculo pa desaroyo por tuma lugar.
Henter pueblo ta testigo cu e sitio a cuminza bira bunita y enbes di crea discordia, recapasita, “bin bij”, stop e gezeur di mucha y pone bo contribucion pa e area por bira algo cu nos tur ta contento di dje. A bira ora pa pone interes general di e area aki na pecho, riba interes personal.
