Como parti di e agenda intensivo di e Interparlementair Koninkrijksoverleg (IPKO) na Hulanda, nos delegacionnan a realisa un bishita di trabou sumamente inspirador na e bario De Vijfhoek na Haarlem. E bishita aki tabata enfoca riba e proyecto innovativo ‘De Buurt als Ecosysteem’ (E Bario como Ecosistema), un iniciativa cu ta cambia e bista tradicional riba cuido di adulto mayor, uzando e forsa y e union di e propio vecindario y organisacionnan local.
Nos delegacionnan a wordo ricibi na stadhuis di Haarlem pa e wethouder di Zorg & Welzijn, sra. Diana van Loenen. Despues di un introduccion historico di e bario, nos a cana den e vecindario den diferente grupo pa topa cara a cara cu e habitantenan di e bario y conoce e programanan exitoso for di cerca.
Entre e iniciativanan cu a resalta, tin proyectonan manera ‘Fit in de Vijfhoek’ (deporte pa adulto mayor structuralmente dos biaha pa siman den aire liber), ‘Uurtje van het buurtje’ (un momento semanal di encuentro pa combati soledad), y e controlnan di salud gratis un biaha pa luna door di enfermeronan di bario.
Un concepto cu a hala hopi atencion ta e ‘Voorzorgcirkels’ (circlonan di precaucion), caminda gruponan chikito di “bisiña/buurtbewoners” ta duna otro un man boluntariamente cu cosnan di tur dia, creando un red di proteccion social sin mester depende mesora di cuido profesional.
Un enfoke humano pa demencia
Despues di e recorido, e delegacion a wordo ricibi den e Museum van de Geest, den presencia di e President di Eerste Kamer, sra. Mei Li Vos. Eynan, sra. Vera Bergkamp (hefe di Zorgbalans) a splica con structuralmente kier transforma barionan den comunidadnan autosuficiente, caminda bisiñanan, boluntario, comerciante y profesionalnan di cuido ta traha hunto.
Un momento hopi profundo di e bishita tabata e presentacion di Prof. Dr. Anne-Mei The, experto den cuido di largo plaso y demencia. El a splica e concepto di ‘Sociale Benadering Dementie’ (e Enfoke Social riba Demencia), argumentando cu e sistema actual ta enfoca demasiado riba e parti medico di e enfermedad, lubidando e bida diario, e sintimento y e experencia di e persona mes. Esaki ta baha e calidad di bida structuralmente, locual ta exigi un cambio di perspectiva completo den e forma con nos ta trata demencia den nos sociedad.
E bishita a clousura cu un recorido pa e exposicion “Nieuw Oud! De kunst van het ouder worden”.
Parlamentario Drs. Shailiny Tromp-Lee a comparti su impresion riba e bishita aki: “E bishita aki a confirma structuralmente locual mi ta boga p’e semper: e forsa di un comunidad ta sinta den su union y den e cuido cu nos ta duna esnan di mas cerca (no mester ta famia, tambe bo bisiña y amistadnan) y nos adultonan mayor. Mira con un bario por organisa su mes pa combati soledad y con nos mester cambia e mirada riba demencia, enfocando riba e ser humano y no riba e enfermedad puramente, ta lesnan valioso cu nos mester hiba Aruba pa implementa den nos propio barionan.”
