Parlamentario Endy Croes ta haci un apelacion serio na Gobierno di Aruba pa demostra liderazgo y tuma accion concreto dilanti di e desaroyonan petrolero sin precedente cu ta tumando luga den nos region. Segun e parlamentario, e cambionan politico na Venezuela desde 3 di januari ultimo a habri porta pa un oportunidad economico historico den e sector energetico. Sinembargo, e ta lamenta cu, mientras paisnan den region y empresanan multinacional ta capitalisando caba riba e oportunidad aki, Aruba ta kedando atras pa falta di un vision strategico di parti di e gabinete actual.
Un transformacion energetico cu inversionnan di gran escala
Segun Croes, e panorama petrolero den Caribe y Latinoamerica a cambia radicalmente den e ultimo lunanan, creando un ola di inversion grandi pa e paisnan cu sa con pa conecta cu e mercado aki:
- Companianan petrolero di renombre mundial manera Chevron, Eni, Shell, socionan di North American Blue Energy y recientemente Exxon a cera contratonan biyonario cu Venezuela den e sector di petroleo y gas.
- Na fin di augustus 2026, Merca y Venezuela a yega na un acuerdo historico di 100 aña pa maneha 17 campo di petroleo den e Faha di Orinoco y Lago di Maracaibo. E plan ambicioso aki tin como meta pa aumenta produccion te na 5 miyon bari pa dia pa aña 2030, garantisando acceso na 65 mil miyon bari di reserva.
Aruba tin e infrastructura, pero ta ausente na mesa di negociacion
Segun Parlamentario Croes, Aruba tin un posicion geografico privilegia y infrastructura clave pa forma parti di e cadena logistico y energetico aki. Cu wafnan profundo pa barconan grandi y 17 tanki cu un capacidad di alrededor di 10.7 miyon bari pa warda crudo (storage) of como upgrader pa procesa crudo pa mercado Mericano, esaki ta e oportunidad ideal pa reactiva e di dos pilar economico na San Nicolas.
Sinembargo, Gobierno di Aruba ta completamente ausente na e mesanan caminda decisionnan regional ta wordo tuma. Croes ta señala un reunion reciente na Nacionnan Uni na Washington, caminda e Prome Ministernan di Hulanda y Corsou, hunto cu e Minister di Asuntonan Exterior di Hulanda, a dialoga cu Venezuela riba desaroyo petrolero pa Corsou. Aunke Minister Dowers tambe tabata na Washington, e no a participa na e encuentro aki ni a busca acercamento cu e partnernan presente.
Mocionnan di Parlamento ignora
Cu bista riba e potencial economico aki, fraccion di MEP a actua trempan. Den lunanan di februari y april, Parlamento a aproba unanimamente dos mocion pa instrui Minister Wever y Minister Dowers pa busca partnernan strategico den e sector petrolero pa desaroya un tankfarm of un Upgrader riba e tereno di refineria na San Nicolas
Apesar di e mocionnan cla aki di Parlamento, Croes ta splica cu Gobierno a scoge un direccion totalmente diferente:
- Falta di transparencia: Na momento cu Parlamento tabata spera splicacion di Minister Wever riba e ehecucion di e mocionnan aproba, e reunion a wordo geschors sin ningun motibo valido, strobando e proceso di transparencia.
- Proyecto HART: Riba 16 di juli ultimo, Gobierno a opta pa firma e Proyecto HART cu Staatssecretaris Van der Burg di Hulanda. Bou di e acuerdo aki, tres experto Hulandes lo presenta entre 3 pa 5 plan pa e zona di refineria te na aña 2027, lagando e oportunidad petrolero actual na banda mientras otro paisnan ta cera deal awor.
- Importacion di sushi pa San Nicolas: Ademas, Croes ta cuestiona seriamente e bishitanan reciente di Prome Minister Mike Eman na Boneiro, Corsou y Hulanda pa atrae companianan cu kier importa y procesa sushi di otro isla riba e tereno di e refineria, en bes di enfoca riba un industria petrolero di balor halto.
Un yamada pa cambia rumbo
Parlamentario Croes ta enfatisa cu capitalisa riba e desaroyo petrolero den region por genera miles di cupo di trabou bon paga y trece un impulso economico structural pa San Nicolas y pa henter Aruba. Pa e motibo aki, e ta urgi Gobierno pa cambia rumbo mesora, respeta e mandato di Parlamento y actua cu determinacion prome cu Aruba perde e oportunidad di oro aki definitivamente.





