Arubaanse Voetbal Bond (AVB) a anuncia oficialmente e partido Final di e campeonato den Categoria Mayor (U-17). E dos miho ekiponan di e categoria aki, S.V. Nacional y S.V. RCA, a logra avansa exitosamente pa e gran final, caminda nan lo disputa e titulo maximo pa determina cua lo corona como e campeon di Aruba su futbol.
E directiva di AVB a manda un saludo di exito na tur dos organisacion, reconociendo e esfuerso y dedicacion di e hungadonan, entrenadornan y directivanan pa yega na e instancia decisivo aki di e torneo.
Detayenan di e partido
E wega decisivo aki lo tuma lugar diabierna, dia 19 di Juni 2026, pa 8:30 PM riba e tereno di C.D.G.T. na Dakota. E portanan di e stadion lo habri un ora prome cu e inicio di e partido pa asina ricibi tur e fanaticada.
Reglamento den caso di empate
Cu e obhetivo di garantisa un definicion mesora riba tereno di wega, AVB a informa cu si na final di e tempo reglamentario e partido keda empata, lo pasa manda un biaha pa e tanda di tironan penal (penalty), aplicando e prome tanda di 5 shot pa cada ekipo. Si despues di e prome tanda aki ainda e score ta empata, lo sigui ehecuta e tironan un pa un te na momento cu tin un ganador defini.
Puntonan importante di organizacion y protocol
Pa garantisa e luho y e bon orden cu un final asina merece, AVB a stipula un serie di puntonan clave cu tur dos club y e fanaticada mester tene cuenta cun’e:
- Preparacion y Orario: Ta pidi entrenadornan pa organisa e warming-up trempan pa asina garantisa cu e partido por cuminsa estrictamente na e orario stipula di 8:30 PM.
- Ubicacion di Fanaticada: E fanaticonan di tur dos ekipo lo wordo ubica den e tribuna parti ariba (e seccion sin dak), caminda AVB lo tin su cashier pa e benta di entrada.
- Protocol di Entrada: E salida di e hungadonan pa e tereno di wega lo wordo compaña pa e Himno di FIFA, sigui pa e Himno Nacional di Aruba.
- Personal riba Banki: Cada organisacion tin permiti un maximo di 5 persona adulto riba banki di reserva (Entrenador, Asistent Entrenador, Masahista, Team Lider y un persona extra).
- Cooling-Break: E referee principal di e partido lo tin e autoridad pa stipula e minuutnan di cooling-break si e condicionnan ta requeri esaki.
- Documentacion obligatario: Cada organisacion mester percura pa tin nan carnetnan di hungado y e formulario di wega debidamente yena y cla na tempo, pa asina e referee di AVB por hasi su control debido.
Ceremonia di Premiacion
E maximo organismo di futbol local lo conta cu e presencia di su fotograaf oficial, kende lo ta encarga di saca potretnan durante transcurso di e partido completo y specialmente den e ceremonia final di premacion. Pa e clausura, AVB lo otorga un maximo di 25 medaya y un copa na cada ekipo.
