No tin nada mas bunita, y bon cu haci bon na bo prohimo, e no tin mester ta di mes un rasa cu bo, of mesun creencia cu bo, simplemente haci bon, pasobra bondad ta bin di Dios, y Dios ta recompensa tur esnan cu ta haci bon.
Tene cuenta cu esaki:
Mateo 25:44 Hesus ta bisa: E ora ey tambe nan lo contesta,bisando: Senjor ki dia nos amira bo cu hamber, of cu sed, of como stranhero,of sunu, of den prison,y nos no a sirbi bo.
E ora ey E lo contestanan , bisando: Di berdad mi ta bisa boso, tur loke boso a keda sin haci pa un di esnan di mas chikito aki, ta pa Mi boso a keda sin hacie.
Nunca ora nos yuda hende, nos no mester spera, nada bek di e hende cu nos a yuda, pero Dios cu ta den cielo ta mira tur cos, y ta recompensa nos, pasobra E ta Dios.
No laga di haci bon na esnan cu merece esaki,si ta den bo poder pa hacie,No bisa na bo prohimo, Bay bolbe, y manjan lo mi duna bo, miemtras bo tin ey cu bo.( Proverbionan 3:27-28).
Ma stima boso enemigonan, haci bon, y fia sin spera di hanja nada bek,y boso recompensa lo ta grandi,y boso lo ta yuinan di e Haltisimo,pasobra e mes ta carinjoso, pa ingratonan y malbadonan, Sea misericordioso, mescos cu boso Tata ta misericordioso.( Lucas 6:35-36).
Instrui esnan cu ta rico den e mundo actual, pa nan no ta soberbe y pa nan no fiha nan bista riba e inseguridad di rikesa,ma riba Dios. Kende ta provee pa nos tur na abundancia,pa nos disfruta di nan. Instrui nan pa haci bon, pa nan ta rico den bon obra,pa nan ta generoso, y dispuesto pa comparti,pa nan montona pa nan mes un bon fundeshi pa futuro, pa nan gara loke ta bida berdadero.( 1 Timoteo 6:17-19).
Esaki ta un palabra fiel,e cosnan aki,mi kier pa bo confirma constantemente,pa esnan cu a kere den Dios,percura di haci bon obranan, e cosnan aki ta bon, y di probecho pa hende.( Tito 3:8).
Laga nos tene firme na e confesion di nos speransa,sin vasila,pasobra esun cu a priminti ta fiel, laga nos considera con pa stimula otro pa stima y haci bon obra.( Hebreonan 10:24).
No laga di haci bon y di comparti cu otro. Pasobra sorto di sacrifisionan asina ta agrada Dios.( Hebreonan 13:16).
Semper ora un hende kier haci bon, e lo enfrenta oposicion, pero nos mester sinja nos yuinan, cu no ta importa kico hende bisa, pasobra bondad ta wordo aproba door di Dios. Tin biaha bo ta yuda un hende awe, y e bondad cu bo haci awe, ta bay refleha den bida di su nieto aki un paar di anja, pasobra bondad ta un bon fruta.
E sistema di mundo ta pone cu orguyo y egoismo ta lanta cada dia mas, bo ta mira cuanto hende ta pasa den necesidad, cuanto ayudo humanitario ta wordo manda den paisnan, pero tin un grupo ta horta e cosnan y bende cu esnan cu ta den necesidad, of ta reparti e cosnan entre nan y laga hende sigi sufri y muri di hamber.
Cosnan asina ta bini directamente, for di trono di scuridad, hechonan asina ta structura y plan diabolico, y ta cosnan asina nos tin papia cu nos yuinan, pasobra tempo ta birando dificil, pero den tur sircumstancia nos mester sigi haci bon.
Ki dushi y ki bunita ta ora nos biba bon cu otro, ora nos ta consciente di otro su necesidad y yuda otro den tur momento cu mester.
Sinceramente, Pastor Marcel Balootje
